Luneda Sufali ishte një ndër emërimet të konsideruara suprizë të kryeministrit Edi Rama, menjëherë pas marrjes së mandatit të tij të parë qeverisës në shtator të vitit 2013. Sufali, edhe pse nuk kishte mbushur ende 30 vjeç në atë kohë, u emërua Drejtoresha e Lojërave të Fatit. Kujtojmë se para se të merrte detyren e rëndësishme shtetërore, Sufali kishte një përvojë profesionale në kompaninë private të gazit, “GTS-Gazra Teknike Shqiptare” shpk, ndërsa lidhjet mes tyre vijojnë të mbeten shumë të forta deri më sot.
Vlen të theksohet se ato nuk janë vetëm profesionale, por edhe ngushtësisht familjare. Sufali është drejtoreshë e rëndësishme në Ministrinë e Shëndetësisë e Mbrojtjes Sociale. Në nëntor të vitit 2017, ajo u emërua Drejtoreshë e Shërbimit Social Shtetëror, strukturë nën varësinë direkte të ministres Ogerta Manastirliu. Ndërkohë, sipas boldnews.al kompania “GTS”, së bashku me ‘Messer’ shpk, përbën ‘monopolin’ në fitimin e tenderave multi-milionësh për oksigjenin spitalor, të zhvilluar pikërisht nga Ministria e Shëndetësisë, e drejtuar nga Manastirliu.
Lidhja Sufali-GTS
Luneda Sufali, në profilin e saj zyrtar në rrjete sociale ka shënuar se ka qenë e Drejtore e administratës në kompaninë private “GTS”, para se Edi Rama ta emëronte në krye të Lojërave të Fatit. Karriera e saj ka vijuar me ngritje që prej asaj kohe. Në nëntor të vitit 2015, për arsye të pasqaruara, Sufali dha dorëheqjen nga posti në Ministrinë e Financave dhe u emërua Sekretare e Përgjithshme në Ministrinë e Mirëqënies Sociale, e cila në atë kohë drejtohej nga Blendi Klosi. Më pas, në nëntor të vitit 2017, Sufali u emërua Drejtoreshë e Shërbimit Social Shtetëror, me firmën e Ministres së Shëndetësisë, Ogerta Manastirliu. Ndoshta për rastësi, por paralel me progresin në karrierë të Sufalit, kompania “GTS” forcoi pozitat e saj në tenderat publikë të oksigjenit mjekësor, aq sa sot ka arritur të jetë në fazë “monopoli”.
Vlen të theksohet se kompania “GTS” është regjistruar në Shqipëri në vitin 1996 dhe është në pronësi të kompanisë italiane “Sol” s.p.a. Shoqëria “GTS” ka administratorë në Shqipëri shtetasit italianë Giovanni Annoni dhe Matteo Fumagalli Romario. Ndërkohë, në vitin 2014 administratorët italianë ia delegojnë kompetencat e tyre shtetasit shqiptar Besnik Halili, i cili është bashkëshort i Luneda Sufalit.
Aktualisht, Halili është përfaqësues i kompanisë për kryerjen e të gjitha veprimeve të nevojshme të kompanisë në raport me institucionet publike. Pra, përfshirë edhe dokumentacionin për përfshirjen në tendera. Gjithashtu, tek pjesa e tenderave, duket se roli i Besnik Halilit ka qenë vendimtar për forcimin e portofolit financiar të kompanisë “GTS”.
Monopoli
Sipas të dhënave të transaksioneve publike në portalin “openprocurment”, lidhur me tenderat e fituar nga kompania “GTS” në strukturat shëndetësore për “oksigjenin spitalor”. Rezulton se që prej vitit 2016, kompania “GTS” është fituese thuajse në pjesën më të madhe të tenderave. Por, deri në atë moment, ka pasur një veçori në tenderat e fituar prej saj, pasi ka pasur edhe konkurentë të tjerë. Duke filluar nga fundi i vitit 2017, që rastësisht përkon edhe me forcimin e raporteve institucionale Ogerta Manastirliu-Luneda Sufali, “GTS” merr trajtën e një kompanie “monopol”. Në të gjitha tenderat e zhvilluar nga Ministria e Shëndetësisë dhe strukturat vartëse, përfshirë Qendrën Spitalore Universitare Tiranë për oksigjenin spitalor, fitues shpallet vetëm “GTS” ose e njëjta kompani, në bashkëpunim me “Messer” shpk.
Ky bashkim operatorësh u shpall së fundmi edhe fitues i një tenderi pa garë, me vlerë 5 milionë euro për furnizimin e QSUT-së me oksigjen spitalor. I njëjti bashkim operatorësh, në periudhën 2016-2020, është shpallur fitues edhe në një seri tenderash spitalorë, me fond limit me vlerë totale rreth 4 milionë euro. Ndërkohë, kompania “GTS”, ku ka marrë pjesë si operator i vetëm, ka fituar rreth 3 milionë euro të tjera tendera në strukturat spitalore, përgjatë periudhës 2016-2020.
