Sipas zv.Ministrit të Shëndetësisë Albert Nikolla protesta e qytetarëve për vrasjen e 25-vjeçarit Klodian Rasha nga efektivi i forcave të policisë “Shqiponja” është pa frymë.Në një intervistë në Ora News, ai tha se protesta nuk është ngjarja e ditës, por është e fryrë nga mediat.Sipas Nikollës disa parti opozitare, duke parë se janë të dështuara dhe pa projekt politik, e gjejnë shpresën te dhuna.
“Ju jeni të njëanshëm. Po digjen pemët dhe po prishen semaforët. Kjo është një protestë pa frymë. Këtu nuk ke qindra dhe mijëra njerëz, por janë 10-20 njerëz. Nuk është e vërtetuar që në qeli janë futur shumë veta në qeli të vogla. Shumë media janë shumë të pozicionuara, ju jeni një media kundër. Krejt vëmendja juaj përqendrohen tek ata 20-30 veta në protestë. Protesta nuk është ngjarja e ditës, është e fryrë nga mediat.
Unë shikoj pemë të djegura, gurë dhe semaforë të prishur. Po shikoj që mbi policët janë hedhur gurë. Ju niseni me supozime mbi dhunën. Policia në moment ekstreme përdor dhunë se për atë punë është. Këto nuk janë protesta, por takime të vogla njerëzit që mblidhen aty. Të protestojnë paqësisht se na lanë pa semaforë. Nuk jam dakord me këtë fakt. Disa parti opozitare, duke parë se janë të dështuara dhe pa projekt politik, e gjejnë shpresën te dhuna. Nuk kthehet më Sali Berisha në pushtet. Policia e shteti është sjellë në mënyrë të rregullt. Janë plagosur 17 policë”, ka thënë Nikolla.
