E kemi përmendur shpesh herë që nuk ka asnjë ndarje mes PD dhe PS. Këtë e vërteton mjaft mirë fakti që shumë eksponentë apo persona që kanë lidhje me PD kanë marrë tendera të majmë nga pushteti aktual ngjyrë mavi i Rilindjes së Ramës. Njëri prej tyre është edhe djali i ish-kryeministrit Aleksandër Meksi. Ky i fundit ka qenë në pushtet gjatë kohës kur vendi drejtohej nga Partia Demokratike.
Mirëpo rezulton se në fakt Endri Meksi, djali i Aleksandrit, ka përfituar një dorë të mirë lekësh nga Rilindja nëpërmjet kompanisë në pronësi të tij, “MC Networking” ose shkurt ‘MCN”. Mjafton të përmendim faktin se vetëm në muajin gusht të këtij viti, kjo kompani fitoi rreth 1 miliardë lekë të vjetra tender nga RTSH për kryerje shërbimesh. Kompania e Endri Meksit garoi e vetme dhe fitoi me një ofertë thuajse të barabartë me fondin limit.
Jo vetëm kaq, por rezulton se gjatë 7 viteve të fundit, kohë në të cilën Rilindja ka ardhur në pushtet, kompania e tij ka përfituar pagesa nga institucionet shtetërore në vlera që kapin gati 1 milion euro. Këto pagesa vijnë kryesisht nga AKSHI i Mirlinda Karçanaj, nga Drejtoria e Përgjithshme e Tatimeve, nga Qarku Tiranë, nga një sërë universitetesh në vend e kështu me rradhë. Me sa duket sado “blu” të jesh, leku nuk ka ngjyrë dhe kaq mjafton për t’u kthyer në një rilindas të vërtetë që merr paratë e popullit.
