Ministri Arben Ahmetaj, është një ndër 47 qeveritarët e politikanët, që nuk deklarojnë në CV-të e tyre, faktin se e kanë nisur karrierën nga punë si mësues fshatrash, magaziner, suvaxhi, polic, blegtor, shofer trajleri, e shumë profesione të nderuara si këto. Sipas dëshmisë dhënë për Pamfleti, nga H.A., ish-zyrtar i Kufirit të Doganës Kakavijë në vitet 1993-1994, emëruar e shkarkuar nga kryekontrollori i shtetit Blerim Çela, mësohet se “Tigri” e ka nisur biznesin me importimin dhe shitjen e qenve.
Këtë biznes e filloi krejt rastësisht, kur ishte magaziner në bizneset e një politikani të lartë në Gjirokastër dhe dërgohej prej tij në Janinë për të marrë në dorëzim dhe shoqëruar auto-bote me karburant, çimento, lëngje e pije alkolike rifurxho. Një tregtar grek, duke parë shkathtësinë dhe lidhjet e Arben Ahmetajt si i punësuar tek pushtetarët lokalë dhe qendrorë të jugut që bënin pazare me Konsullin Grek, Xristo Jakovu për akses kontrabande në kufi, i kishte propozuar “Tigrit”, të fillonin së bashku biznesin e qenve, të preferuar për roje e kafshë familjare.
Po sipas dëshmisë së zyrtarit të kufirit të doganës në muajin mars 1993, Arben Ahmetaj futi në Kakavijë, 2 furgonë me kafazë me 30 qen racash të ndryshme e kështu vazhdoi deri në fund të vitit 1995, kur ky lloj biznesi u hap masivisht në Shqipëri. Në doganë nuk paguanin taksa doganore, pasi i fusnin kontrabandë, me justifkimin se ishin porosi familjare, duke shfrytëzuar faktin se Shqipëria nuk kishte ligj për importin e kontrolluar të qenve.
Këtë biznes qensh në vitet 1993-1995, “Tigri” jo vetëm nuk e ka deklaruar në “CV” zyrtare si “historik” të punëve që ka bërë, por e ka fshehur duke deklaruar së gjoja gjatë kësaj periudhe ka qenë “Ekspert i Fondit Monetar Ndërkombëtar” për Shqipërinë. Në fakt, bashkë me kunatin e tij shoferin aktual zyrtar A. Ceka dhe vëllain e tij D. Boni, ka bërë biznes me kontrabandën e qenve, duke futur e shitur në Shqipëri, 12 raca, mes tyre këto: Border Collie, Poodle, Pastor Gjerman, Doberman Pinscher, Labrador Retriever, Papillon etj.
Nga janari 1996-deri në fund të shkurtit 1997, “Tigri” qëndroi në Greqi, por deklaron se gjoja ka qenë me studime në SHBA, ndërsa më 15 mars, 4 ditë pas dekretimit kryeministër të Bashkim Finos, u emërua “ekspert” i Letrave me Vlerë në Ministrinë e Financave. Nga muaji shkurt 1998 e deri në janar 1999, punoi si drejtor i tatimeve të Shqipërisë, kohë kur nisi biznesin “Hermes” të impulseve telefonike me Klodian Zoton, ndërsa prej andej zv/ministër i Ekonomisë, Tregtisë e Integrimit.
Në këtë detyrë, qëndroi deri në qershor 2005, kur u arratis nga Shqipëria pas ardhjes së Berishës në pushtet, mbasi ishte nën hetim për vjedhjen e 50 milionë USD, por pikënisja e karrierës së tij deri në majat e PPP-ve të “rilindje” është biznes-kontrabanda e qenve.
