Vdiq para dyerve të spitalit, shfajësohet QSUT: Pacientin e kishim mjekuar

Skandali i 53-vjeçarit Lutfi Çekiri nga Ndroqi, i cili ndërroi jetën pas sorollatjeve që i bëheshin në spital për të marrë mjekimin e duhur duket se po mbulohet me fjalë, pasi që veprat u shmangën. QSUNT na bën me dije se nga verifikimet e kartelës klinike dhe ecurisë së ndjekjes klinike të pacientit, rezulton se pacienti në QSUNT ka marrë ndihmën mjekësore të nevojshme dhe ishte duke e bërë për vëmendje gjithë skenën e sëmundjes.

QSUNT duket hapur se po shfajësohet duke sqaruar:

Lidhur me rastin e publikuar në disa media dhe disa rrjete sociale, mbi rastin e pacientit L.Ç., Qendra Spitalore Universitare “Nënë Tereza” duke i shprehur ngushëllimet familjes së të ndjerit, informon se nga verifikimet e kartelës klinike dhe ecurisë së ndjekjes klinike të pacientit, rezulton se pacienti në QSUNT ka marrë ndihmën mjekësore të nevojshme. QSUNT sqaron publikun se trajtimi mjekësor vijon pa ndërprerje, për të gjithë qytetarët që kërkojnë ndihmë mjekësore, pavarësisht diagnozave.

Por vdekja e trishtë e 53-vjeçarit tregon të kundërtën, pasi një ditë para se të vdiste, ai së bashku me bashkëshorten kishin kaluar ditën e natën pranë ambienteve të spitaleve, të dëshpëruar se dikush mund ti shihte dhe do ti jepte një përgjigjje për gjendjen e rënduar shëndetësore, por jo. Çekiri u intervistua duke treguar se si e kaluan nga një spital tek tjetri, pa u shqetësuar aspak se sa po përkeqësohej gjendja e tij.

Ai tha:

Mbrëmë ishim në urgjencë dhe na kanë sjellë këtu për stomakun. Këtij i thotë shko tek infektivi, tjetri thotë s’je për këtu. Kemi qenë mbrëmë në Urgjencë, nga këtu shkuam në Laprakë. Atje më dhanë qetësues e më thanë duhet të shkosh të vizitohesh për stomakun. Tani nuk na japin përgjigje, një thotë shko atje. Jam me veshka, me ulçerë në stomak, tensionin e kam të ulët.