Lali Eri shkarkon e qarkullon “kokat” e korrupsionit në bashki; ikën dhëndri i Fatmir Xhafajt, reziston superdrejtori Taulant Tusha

Ditën e hënë janë shkarkuar, zëvendësuar e qarkulluar 16 drejtorë qendrorë të Bashkisë-Tiranë, që siç jemi informuar, nuk ka qenë dëshirë e “Lali Erit”, për faktin se prej 5 vitesh, ata kanë qenë tepër korrekt në firmosjen e aferave korruptive të urdhëruara prej tij. Kjo “fshesë” e skemë riqarkullimi emrash nga një post në tjetrin, është marifet i Edi Ramës, për të spostuar nga qeverisja dhe fshehur gjurmët e drejtorëve që kanë firmosur vjedhjet, siç veproi me shkarkimin e Sekretarit të Përgjithshëm të Ministrisë së Brendshme, Plarent Ndreca. Referuar emrave të drejtorëve kryesorë që janë hequr, konstatojmë se janë më të denoncuarit në media dhe të zbuluarit nga KLSH; për fakte korrupsioni me tendera, prona, licensa, kontrata e zhdukje fondesh me falsifikime dosjesh.

Në krye të listës së shkarkimit, është Ditjon Baboçi, Drejtor i Urbanistikës, dhëndër i Fatmir Xhafajt, heqja e të cilit, ka lidhje edhe me sinjalin paralajmërues, për përjashtimin e Fatmir Xhafës. Prej 5 vitesh, Rama-Veliaj e përdoren Baboçin si “babuç” për të firmosur betonizimin e Tiranës me 72 leje ndërtimi për kulla; zhdukjen e 130 m2 lulishte, grabitjen e 200 mijë m2 troje pronë publike e 120 banesave private, të cilave u është grabitur trualli e dhuruar oligarkëve.Në listën e shkarkimit është dhe Redi Molla, Drejtori i UKT, i cili për pazare të Ramës e Veliajt, ka firmosur 112 milionë Euro investime, shërbime e blerje që nuk janë kryer, por në letra figurojnë të kryera (sipas KLSH).

Përshtypje të bën fakti, se në krye të UKT; është emëruar “G-99” Elton Kacidhja, deri tani Drejtor i Rrugëve e Ndriçimit, ku sipas KLSH, ka firmosur 27 milionë Euro tendera fiktivë, për gjoja rrugë, trotuare, kanalizime e ndriçim publik, në fshatrat ku nuk ka asnjë banorë.Nuk është hequr as këtë herë, “koka e korrupsionit”, Taluant Tusha, krye-drejtori i Shërbimeve Publike të Bashkisë-Tiranë që kontrollon 26 drejtorët e tjerë dhe shef i bordit të Ujësjellësit.

Ja disa nga të shkarkuarit dhe qarkulluarit në drejtori të tjera

1. Ditjon Baboçi, Drejtor i Urbanistikës zëvendësohet nga vartësja Frida Pashako.
2. Redi Molla, Drejtor i UKT, zëvendësohet nga Elton Kacidhja, drejtor Rrugëve-Ndriçimit.
3. Bojken Lako, Drejtori i qendrës TEN, zëvendësohet nga këngëtari Vitmar Basha.
4. Erindi Bejko, Drejtor i Përgjithshëm i Bashkëpronësisë, zvendësoeht nga Aurel Çuko.
5. Rigels Balla, Drejtor i Investimeve Publike, zëvendësohet nga Ilda Qazimllari.
6. Besim Petrela, Drejtor i Kulturë-Trashëgimisë, zëvendësohet nga Dhimitraq Furrxhi
7. Esmeralda Byberi, caktohet Drejtore e Zonës së Investimeve të Huaja dhe Diasporës
8. Epidamn Zeqo, Drejtor i Planifikimit Strategjik, zëvendësohet nga Emilda Prifti

Për të shkarkuarit, “Lali Eri” ka sqaruar se nuk kanë probleme korrupsioni, apo pakënaqësi të “bablokut” për zbatimin e detyrave të ngarkuara, por do angazhohen në fushatën zgjedhore. Kështu qoftë, por le t’ia lëmë kohës, për të dëgjuar së cili është shkaku i vërtetë i largimit të tyre nga detyrat./ Marrë nga Pamfleti