Pak ditë më parë një ngjarje e rëndë u shënua në qytetin e Beratit, ku një punonjës i Bashkisë humbi jetën pasi ra nga pema. Ai ishte në orar pune dhe po priste një rrap në mes të rrugës, ndërkohë që shkak për vdekjen tragjike u bë një incident gjatë momentit të prerjes së pemës, pasi ai rrëshqiti dhe u rrëzua fatalisht. Shkaqet e incidentit mendohet të jenë të lidhura me masat e sigurisë në punë, pasi punëtori fatkeq ishte pa rrip sigurimi. Një problem që haset rëndom në fakt në vendin tonë, ku luhet me jetën e punëtorëve duke mos pasur as kushtet më minimale të sigurisë.
Një rast i tillë ka mbërritur në redaksinë tonë, ku një punëtor është fotografuar pa rrip sigurimi gjatë punës për rikonstruksionin e Bulevardit " Zogu i Parë", tender i fituar nga Shkëlqim Fusha, i parapreferuari i bashkisë që drejton Veliaj. Një papërgjegjshmëri dhe një lojë e rrezikshme me jetën në fakt, ndërsa të parët që duhet të hetohen janë pikërisht firmat e ndërtimit që lejojnë punën në kushte të tilla.
Në rast të ndodhjes së një fatkeqësie si ajo e Beratit kush e mban përgjegjësinë? Apo në burg do shkojë sërish një i pafajshëm?! Ndërsa “të mëdhenjtë” vazhdojnë pasurohen në kurriz të popullit të thjeshtë... e ç’e kanë ata... një jetë më pak!
