Siç kemi përmendur disa herë, firma “GJIKURIA” shpk është një ndër më të preferuarat e Rilindjes.
Janë të panumërta tenderat që kjo kompani e drejtuar nga Florenc dhe Milo Gjikuria kanë marrë nga administrata publike, ku mund të përmenden tenderi për rrugën Orikum-Llogara dhe ndërhyrjet në “Parkun Natyror” të Himarës, duke rrënuar “Deltën e Palasës”, përmes hapjes së kanaleve dhe marrjes së gurëve e zhavorrit, në një sipërfaqe prej 2000 apo 3000 metra katrorësh.
Vetëm në 3 vitet e fundit kjo kompani rezulton se ka marrë rreth 3 milionë euro pagesa nga buxheti i shtetit. Lenc Gjikuria apo si njihet ndryshe “Ujku plak i Dhërmiut”, ka marrë një letër nga banorët e fshatit të tij të cilët e quajnë “kërmë”.
Në letrën e shkruar ata e ironizojnë duke i thënë se ai mbron shtëpitë dhe tokat e tyre që pasi i transformon ua rregullon dhe më pas ua vjedh madje shkul edhe ullinjtë qindëra vjeçarë pa kurrëfarë problemi.
Ata shprehen se “me gëzim të madh” kanë marrë vesh lajmin se në shtator do iu marrë edhe plazhin ndërsa Rama shikon çdo gjë që ndodh veç veprave të Gjikurias. Në fund të letrës ata e urojnë “mos u gëdhifsh”.
