Në portale kanë qarkulluar lajme, për një proces gjyqësor mes biznesmenit Andon Dhima dhe familjarëve të Drejtorit të "Top Channel", Ben Blushit.
Bëhet fjalë për një marrëveshje tregtare e iniciuar shumë vite më parë, mes biznesmenit Dhima dhe vjehrrit të Blushit, të ndjerit Abaz Brati.
Ky i fundit ishte pronar i një trualli tek ish-stadiumi Dinamo, i cili nëpërmjet një kontrate porosie, lidhi marrëveshje me kompaninë “AN-INK”, e krijuar nga Andon Dhima.
Por nëse i hedh një sy dokumentet në Qendrën Kombëtare të Biznesit, kompania e Dhimës, e krijuar që në 1995, ka shtuar një ortak të ri në datën 27 prill 2009. Ai është pronari i "TV Klan", Aleksandër Frangaj, i cili ka hyrë me 10% të aksioneve në kompaninë “AN-INK”.
Arsyeja e futjes si aksioner është e thjeshtë, pasi Frangaj ka dalë si garant, se nuk do ta prekte askush nga institucionet e kontrollit të ndërtimit, raporton gazetaAtdheu.
Për këtë shërbim, Sandri i "TV Klan" përfiton 10% të pallatit, për vetëm 10 mijë lekë të reja.
Sipas konvertimit në ndërtim, Andon Dhima i jep Frangajt rreth 800 m2 apartamente e garazhde, për 10% e aksioneve, në pallatin e ndërtuar tek stadiumi Dinamo.
Nga ana tjetër, Dhima nuk i përmbahet marrëveshjen që kishte bërë me Abaz Bratin, për kontratën e porosisë, ku trualli i Bratit do të konvertohej me apartamente.
Pikërisht për mospërmbushje të kësaj kontrate, familjarë të Abaz Bratit, hedhin në gjyq ortakun e Frangajt, Andon Dhima.
Gjykata vendos bllokimin e disa pasurive të Dhimës, deri në përfundimin e procesit gjyqësor.
Por ditët e fundit, Dhima ka përdorur portalet e ortakut të tij, Frangaj, për t'u ankuar për “padrejtësitë” që i janë bërë.
Ai madje thotë se, i ka dërguar një letër Ambasadës Amerikane, ku mes rreshtave kërkon që Drejtorit të "Top Channel", Ben Blushit, t’i hiqet viza amerikane, njësoj siç i është refuzuar viza të gjithë familjes Frangaj.
Por shkrimet në portalin e Frangajt, që së fundi po financohen edhe nga Andon Dhima, kanë edhe një qëllim tjetër, atë të intimidimit gjyqtarëve dhe procesit gjyqësor me familjarët e Abaz Bratit.
Kujtojmë këtu, se për intimidim dhe kërcënim të gjyqtarëve, Frangaj është djegur nga Ambasada Amerikane, duke iu refuzuar viza.
Të njëjtën gabim po bën edhe ortaku i tij, Andon Dhima.
