Mëngjesin e të mërkurës Avdul Rama së bashku me nënën, babain dhe një shok shkuan në det për të mbledhur rrjetat. Por shumë shpejt gjithçka u kthye në një makth për ta, pasi një stuhi e fortë i zuri në det dhe iu përmbyt anija. Në portin e Himarës, ku familja vlonjate jetonte prej vitesh për punë, askush nuk i paralajmëroi për shtrëngatën. Avduli ka rrëfyer edhe njëherë momentet e tmerrit dhe ka treguar se si arriti të shpëtonte, ndërsa nënën e la të vdekur në det.
Ai është shprehur se e ëma i vdiq në duar teksa kishte mundur të shpëtonte vetëm të atin. Stuhia e fortë ngriti dallgët që përmbytën anijen 9 metra të gjatë të blerë me borxhe. Familja Rama humbi kryefamiljaren por dhe varkën e blerë me shumë sakrifica. Dyert e shtëpisë në Vlorë, që ishin mbyllur 17 vjet më parë për një fat më të mirë, u hapën tani për mort nga një fatkeqësi që u mori gjithçka.
Ndërkohë djali tjetër i familjes, Arsen Rama nuk kishe shkuar me ta në det ditën e tragjedisë dhe në momentin kur ka telefonuar familjarët e tij dhe askush nuk i është përgjigjur, ai ka kërkuar menjëherë ndihmë në policinë kufitare.
