Pas aplikimit të sistemit VAR në botën e futbollit, tashmë një teknologji e re po përgatitet nga FIFA. Kjo e funfit synon të përdorë robotët si asistentë arbitra, madje po planifikon që teknologjia e re të aplikohet në kohë për Botërorin 2022 që do zhvillohet në Katar.
Shefi i teknologjisë në Konfederatën Botërore të Futbollit, Johannes Holzmuller, paraqiti planin e tij për një sistem kompjuterik, i cili do të zëvendësojë asistentët në fushë, me një teknologji, e cila gjeneron automatikisht vijat për pozicionin jashtë loje.
Arbitri kryesor do të njoftohet nëpërmjet alarmit në orën e tij, njësoj si në rastin e teknologjisë së portës. Sistemi do të jetë në gjendje të identifikojë edhe cila pjesë e trupit të lojtarit ndodhet në pozicion jashtë loje.
Prova e parë e robotëve asistentëve u krye në dhjetor, gjatë Botërorit të Klubeve në Katar, turne i cili u fitua nga Liverpooli.
Në gjysmën e dytë të këtij viti do të zhvillohen të tjera teste me robotët asistentë, ku synohet që risia teknologjike të jetë funksionale për Kupën e Botës, "Katar 2022".