6 efektivë policie në Korçë me grada të larta nën/komisar dhe krye/komisar, do të hetohen nga SPAK. Ata akuzohen për shpërdorim detyre.
Mësohet se mes tyre janë shefi i policisë rrugore në Korçë Ervin Dervishi dhe shefi i policisë rrugore, në Pogradec Oltion Hyka.
Gjithashtu , të pezulluar nga detyra janë edhe Agron Hima, Kujtim Nuke, Mitat Cani dhe Edmond Terolli. Sipas hetimit të prokurorisë së Korçës ata ishin përfshirë në lirimin e automjeteve që vetë kolegët e tyre bllokonin në qytetet e Korçës dhe Pogradecit, gjatë situatës së pandemisë për shkak të koronavirusit.
Efektivët kundrejt shumave të parave që mernin nga qytetarë të ndryshëm, mundësonin lirimin e automjeteve të bllokuara. Një veprim i tillë është kryer për shumë makina.
Ky veprim është “nuhatur” edhe nga policë të tjerë rrugorë, ku njëri prej tyre mësohet se ka denoncuar rastin dhe abuzimin me detyrën në komisariatin dixhital.
Nisur nga këto veprime, prokuroria e këtij qyteti ka lokalizuar përgjegjësinë penale të lirimit të makinave nga kryekomisari Ervin Dervishi, nën/komisari Oltion Hyka, nën/komisari Edmond Terolli, komisari Agron Hima, nën/komisari Mitat Cani dhe Kujtim Nuke.
