Franca ka njoftuar se ka vrarë liderin e al-Kaedës në Afrikën e Veriut, Abdelmalek Droukdel, gjatë një operacioni ushtarak të zhvilluar në Mali.
Lajmi është bërë me dije nga ministrja franceze e Mbrojtjes, Florence Parly, i cili tha se Droukdel së bashku me anëtarët e rrethit të tij të brendshëm u vranë në veri të Malit të mërkurën.
Gjithashtu, ministrja Parly bëri me dije se forcat franceze kanë kapur një komandant të lartë të ISIS në Mali, në një tjetër operacion në maj.
Ajo tha:
Operacionet e guximshme kryen goditje të mëdha për grupet terroriste. Forcat tona, në bashkëpunim me partnerët e tyre në Sahel, do të vazhdojnë t'i godasin pa mëshirë terroristët.
Kush ishte Droukdel?
Si kryetar i al-Kaedës në vendet e Magrebit, Droukdel ishte drejtuesi i të gjithë operacioneve të grupit terrorist në Afrikën e Veriut.
Abdelmalik Droukdel u dënua me vdekje në mungesë në vitin 2012 nga një gjykatë në Algjeri, pasi u akuzua për sulme terroriste duke përdorur eksplozivë.
Ai u akuzua për tre sulme me bomba në kryeqytetin Algjer në prill të vitit 2007, ku u vranë 22 njerëz dhe u plagosën më shumë se 200 të tjerë.
Roli i Francës
Mijëra trupa franceze janë vendosur në Mali që nga viti 2013.
Franca ndërhyri ushtarakisht në shtetin afrikan pasi militantët islamikë pushtuan pjesët e veriut. Me ndihmën franceze, ushtria e Malit ka rikuperuar territorin, por pasiguria vazhdon dhe dhuna është përhapur në vendet fqinje.
Rreth 4500 trupa franceze kanë shërbyer si pjesë e Operacionit Barkhane në mbështetje të forcave të Malit, Mauritanias, Nigerisë dhe Burkina Fasos.
Burimi: BBC|Përktheu dhe Përshtati: JOQ Albania