Partia Demokratike ka ngritur akuza të forta ndaj Bashkisë së Tiranës.
Zëdhënësja e PD-së, Ina Zhupa, përmes një postimi në rrjetet sociale, thotë se Bashkia e Tiranës ka shpërdoruar supertenderin një milidard lekësh, duke betonizuar 6 mijë metra/katror sipërfaqe të gjelbërt në Parkun Rinia.
Zhupa shkruan se bazuar në një verifikim të pamjes se si ishte parku para zhvillimit të tenderit dhe pas ndërhyrjes, rezulton se fushës së gjelbër i janë hequr rreth 6 mijë metra/katrorë, të cilat tashmë janë betonizuar.
Ajo thekson se betonizimi është e vetmja metodë pune që njeh kryebashkiaku i Tiranës, Erion Veliaj, të cilin e cilëson si "kryebetonier".
Postimi i Zhupës
PRO cdo këndi lojrash, KUNDRA shpërdorimit të parasë publike, KUNDRA paligjshmërisë, KUNDRA betonizimit që kryen Erion Veliaj.
Kryebetonieri Veliaj shpërdoroi 1 miliard lek per te prishur gjelberimin e nje parku per femije edhe te rritur, nje mjedis relaksues, lojrash ne natyre edhe i gjelber per ta bere ate gjoja si kend lojrash ne kundershtim edhe me ligjin dhe kriteret e Planit Urbanistik te Tiranes!
Referuar dokumentit të Strategjisë Territoriale të zhvillimit për Bashkine Tiranë është konsideruar Parku Rinia si hapesire te rendesishme ambientale ekologjike.
Është e dukshme që Bashkia Tiranë përpiqet ta propagandojë si një projekt modern por në të vërtetë nuk është asgjë tjetër veçse afera e rradhës me klientin e ngushtë Agikons shpk dhe betonizimi i të fundit hapësirë të gjelbër pranë qendrës së Tiranës duke i hequr Parkut një hapësire të gjelbërt rreth 6000 m2!
Betonizimi eshte e vetmja metode pune qe njeh Veliaj ne krye te Bashkise Tirane!”