Në daljen e tij të fundit publike për çështjen e koronavirusit në Shqipëri, kryeministri Edi Rama ndër të tjera mbajti edhe një fjalim "mallëngjyes", përmes të cilit dëshironte t'ju tregonte shqiptarëve se ai nuk vjedh, por punon shumë dhe me pasion.
Rama, në një përpjekje të dëshpëruar për t'u hedhur hi syve shqiptarëve e të duket si 'i pafajshëm' para popullit, deklaroi ndër të tjera se "s'ka lindur në kallëpin e politikanit dhe as nuk do të vdesë brenda atij kallëpi".
Më tej, ai tha se nuk zgjohet pas të tjerëve, duke nënkuptuar se si "baba i kombit" që u vetëshpall, është i pari që zgjohet nga gjumi.
Me një vetëbesim dhe një ton të rëndë, Rama u shpreh:
Unë nuk vrās, nuk vjēdh, nuk shantazhoj, nuk shpif, nuk fle para tjerëve, nuk zgjohem pas të tjerëve, nuk zdërhallem për qejfet e mia lokaleve të Tiranës apo rrugëve të botës. Unë nuk punoj për të jetuar, por jetoj për të punuar! Sikur të mos e jetoja këtë punë si një mision për vendin e stërgjyshërve, gjyshërve dhe fëmijët e fëmijëve të fëmijëve të mi si një privilegj të jashtëzakonshëm për të ndihmuar sa më shumë njerëzit dhe kuruar sa më shumë plagët panumërta të këtij vendi, nuk do duroja një minutë jo më ditë për ditë lukuninë e faunës së larmishme të xhunglës politike dhe mediatike. Nuk kam lindur në kallëpin e politikanit dhe as nuk dua të vdes brenda atij kallëpi.