Skandali i rradhës/ U kërkoi lekët, “gangsterat” e Lleshit ofendojnë lavazhierin që punon për bukën e gojës

"Policia e Shtetit ka për mision ruajtjen e rendit e të sigurisë publike, ruajtjen e personaliteteve të larta shtetërore dhe objekteve të rëndësisë së veçantë, garantimin e zbatimit të ligjit, në përputhje me Kushtetutën dhe aktet ndërkombëtare, duke respektuar të drejtat dhe liritë e njeriut."

Kështu thuhet në nenin dy të ligjit 108 për Policinë e Shtetit në Kushtetutë, ku parashikohet qartë që misioni i uniformave blu është ruajtja e rendit dhe sigurisë publike, duke respektuar të drejtat dhe liritë e njeriut.

Por a e zbatojnë të gjithë punonjësit e Policisë së Shtetit këtë ligj, a e kanë kuptuar të gjithë misionin e tyre?

Duke llogaritur denoncime të panumërta të mbërritura në redaksinë e JOQ Albania, apo dhe në mediat e tjera në vend, mund të themi me plot gojën se ka punonjës policie, të cilët e shkelin me të dyja këmbët misionin e tyre, madje përpiqen që me "hijen" e uniformës së tyre të përfitojnë duke bërë "të fortin" e "gangsterin" me qytetarët e thjeshtë.

I tillë është edhe një rast i mbërritur këtë të martë në redaksinë tonë, ku punonjësi i një lavazhi ka denoncuar një tjetër skandal dhe gjest të turpshëm të Policisë së Lleshit.

24-vjeçari shprehet për JOQ Albania se një automjet i Policisë Rrugore mbërriti në lavazhin ku ai punon, për të larë makinën.

Punonjësi i lavazhit thotë se me të drejtë ai iu kërkoi paratë për larjen e makinës, por sipas tij policët e Lleshit iu kthyen keq, duke e ofenduar.

Ai shkruan:

Pershendetje jam djal 24 vjecar puna qe bej eshte lavazh dua tju tregoj per policin e shtetit qe jan te degjeneruar . Kjo makin erdhi tek lavazhi ku une punoj me than qe une ta laj por dhe une ne te drejte duke i kerkuar leket ato mu kthyen ne te keq duke me ofenduar . une nuk kam ndonje te ardhur shume te madhe une 8 milek ne dit paguhem me ato lek nuk di cte bej jam dhe i martuar me nje vajze ne shtepi me qera . Dua ta ndaj me ju kete gje se ndoshta Edvin Rama e shikon dhe mund te marre masa per kete gje sepse jam shtres e ulet .

I riu merr vetëm 8 mijë lekë të vjetra në ditë me atë punë, por duhet të durojë dhe "tangërllëkun" e policëve të Lleshit, të cilët pasi 's'lanë kriminel pa kapur e ua kthenë në ferr atdheun keqbërësve', tashmë u ka ngelur të tregojnë forcën me njerëzit hallexhinj, që punojnë për të siguruar mbijetesën.

Fytyra e Lleshit u tregua edhe njëherë tek këta policë, të cilët nuk përfaqësojnë aspak misionin real të Policisë së Shtetit, duke dëmtuar rëndë imazhin e një agjencie shtetërore, e cila duhet të garantojë rendin dhe qetësinë publike, duke respektuar të drejtat dhe liritë e njeriut.