JOQ Albania
Home

Pasi thithi kokainë me hundë, Lefter Alla i jep tender firmës që ofroi 80 milionë më shumë se konkurrenti
Shkruar nga: M Gjini | Publikuar më: 22/05/2020 23:20

  • Share
  • Share
  • Share
  • Share

Ju kujtohet Lefteri i Bulqizës? Jo? Kujtohuni pak. Është ai tipi që i doli video e thithjes së kokainës me hundë në mes të lokalit pa e vrarë mendjen. Ky zotëri rezulton se përveç përdorimit të hundës në raste të tilla, është gjithashtu edhe kryetar i Bashkisë Bulqizë.

Si i tillë, Lefteri mund të organizojë tendera publikë dhe të shpallë fitues kë të dojë. Konkretisht një tender me numër reference REF-51393-02-24-2020 dhe me objekt ““Rikonstruksion Blloku Lagjia e Re Bulqizë“ i është dhënë bashkimit të dy kompanive që kanë ofruar jo vetëm vlerën më të lartë nga gjithë pjesëmarrësit e tjerë, por madje me një diferencë prej mbi 80 milionë lekë të vjetra.

Po, po, e lexuat pastër dhe qartë. Ndonëse një firmë tjetër kishte ofruar 80 milionë lekë të vjetra më pak, Lefteri i kokainës ia dha tenderin bashkimit të dy firmave “2AF ALBANIA GROUP & LIQENI VII”. Konkretisht këta operatorë ofruan vlerën 24.689.112 lekë të reja pa TVSH, ndërsa kompania me vlerën më të ulët e cila u skualifikua, ofroi 16.642.441 lekë të reja pa TVSH.

Por çfarë do të thotë kjo? Kjo do të thotë se vlera për objektin e tenderit është realisht e fryrë me të paktën 80 milionë lekë të vjetra, pra praktikisht kjo është shifra që do të shkojë qyl në xhepat e fituesëve.

Sipas një denoncimi pranë redaksisë JOQ Albania, mësohet se pronari i firmës 2AF ALBANIA GROUP është në fakt mik i kryetarit. Sipas denoncimit, mësohet se kryetari dhe miku i tij që fitoi tenderin, janë parë shumë shpesh bashkë në kafe e restorante.

Gjithashtu procedura e tenderit, gjithmonë sipas denoncuesit, është zhvilluar në një kohë pandemie ku normalisht nuk duhet të lejohej pasi operatorët kishin vështirësi në plotësimin e dokumentacionit për shkak të COVID-19. Pikërisht ky ishte dhe një nga shkaqet kryesorë në skualifikimin e firmave të tjera, në një kohë, që sipas denoncuesit pranë JOQ Albania, edhe vetë firma fituese ka mjaft mangësi në dokumentacion e plotësim kushtesh.

Ja pra, siç e shikoni, në një tender prej rreth 250 milionë lekësh të vjetra, rreth 80 milionë lekë të vjetra shkojnë në xhepat e fituesëve. Mjafton një rregull i thjeshtë treshi dhe merret me mend se sa është llokma në tenderat me vlerë shumë herë më të lartë. Bravo çuna!