67-vjeçari: Kam tre ditë pa ngrënë e pa pirë në të ftohtë, në kufirin shqiptar s’më qasin

Prej tre ditësh disa emigrantë shqiptarë kanë mbetur të bllokuar në pikën kufitare të Kapshticës.

Midis tyre ka edhe të moshuar. Mes tyre është edhe 67-vjeçari, Petrit Shaqe.

Ai ka treguar se ka tre ditë pa ngrënë dhe pa pirë. I moshuari shqiptar është shprehur se ka tre ditë që rri në të ftohtë.

I moshuari ka thënë se është me ilaçe, pasi vuan nga tensioni. Gjithashtu ka thënë se nuk mund të vazhdojë të qëndrojë më në të tilla kushte.

Më tej ka treguar:

Kam ikur me 29 shkurt në Greqi te vajza se e kisha të sëmurë. Kam 3 ditë, që të premte që jam bllokuar këtu. Jam 67 vjeç, pensionist, me ilaçe e tension dhe nuk po qëndroj dot më. Është ftohtë, bie shi, jam pa ngrënë dhe pa pirë prej 3 ditësh. Nuk kam se çfarë të bëj, këto në kufirin shqiptar nuk më qasin.

Kujtojmë këtu se pak më parë u raportuar se 5 emigrantë që ishin të bllokuar prej tri ditësh në Kapshticë u nisën me urgjencë drejt spitalit të Blishtit. Kurse një tjetër emigrant shqiptar u shpreh se zgjidhjen ua ka ofruar pala greke.