Nexhmije Hoxha, gruaja e diktatorit Enver Hoxha, u nda nga jeta pasditen e sotme në moshën 99-vjeçare.
Ajo ndërroi jetë në banesën e saj në Laprakë.
Pas vdekje së gruas së diktatorit, ka reaguar edhe shkrimtari i njohur, Uran Kostreci, i cili ka qenë i dënuar politik në kohën e regjimit komunist.
Në një prononcim për Zërin e Amerikës, Kosteci tha se sot vdiq Lady Makbeth.
Ai e cilësoi Nexhmije Hoxhën si bashkëpunëtore në të gjitha krimet e komunizmit.
Ai tha:
Unë po ju them se sot ka vdekur Lady Makbeth. Ajo nuk ishte vetëm e shoqja e Enver Hoxhës, i cili ka bërë një mal me krime në kurriz të shqiptarëve, por ishte edhe bashkëpunëtore e tij në këto krime. Mendoj se shqiptarët janë gëzuar sot me këtë lajm, se iku një person aq i urryer. Megjithatë, kjo vdekje nuk e mbyll as dosjen e diktaturës as kapitullin e nostalgjikëve të regjimit komunist. Urojmë që ajo të tërheqë këmbën zvarrë dhe të marrë me vete edhe ca nga këta nostalgjikët e diktaturës, se ende janë shumë. Ata janë mjaft të rrezikshëm, sepse disa kanë qenë edhe vet në terren gjatë aksioneve kriminale të diktaturës, madje kanë bërë edhe vrasje me dorën e tyre. Ne të dënuarit politikë nuk vrasim njeri, sepse ky është ndryshimi ynë me ata. Krimet që ka bërë ajo klikë, ajo kastë, ajo mafie komuniste kanë qenë të tmerrshme dhe vërtet njeriu duhet të gëzojë kur nga këta njerëz kaq të urryer largohen nga kjo jetë dhe na hiqen qafe e të mos i shohim më të paktën.
Kujtojmë këtu që Nexhmije Hoxha nuk u pendua asnjëherë për krimet e komunizmit dhe gjatë gjithë jetës së saj mbështeti veprimet e diktatorit.
