Një pjesë e konsiderueshme e parave publike shpërndahen “pa zhurmë” tek zyrtarët dhe biznesmenët që kanë lidhje të forta me “Rilindjen”.
Një prej kompanive që ka përfituar gjatë këtyre viteve është edhe “Dajti Park 2007”, e cila ka si aksioner kryesor, Desart Kalajën dhe Lulzim Qefalinë, i cili është edhe vëllai i deputetit socialist Xhemal Qefalia.
Këtë gjë e tregon mjaft mirë edhe tenderi i fituar së fundmi nga kjo kompani.
Tenderi me objekt “Shërbim gatimi dhe shpërndarje ushqimi për SUOGJ,Koco Gliozheni” i cili është bërë nga Agjencia e Blerjeve të Përqëndruara.
Nga ky shërbim të cilin do të kryejë për 4 vite, vëllai i deputetit rilindas do të përfitojë 500 milionë lekë.
Por përveç këtij tenderi, kjo kompani ka arritur të fitojë që nga 2016 deri në 2019, 13 tendera nga bashki të ndryshme të vendit, por më të shumtat i ka nga Bashkia e Tiranës.
Ndërsa sipas Thesarit të shtetit, “ Dajti Park 2007”, për vitet 2015-2019, ka përfituar nga buxheti i shtetit 6 miliardë lekë.
Historia e veçantë e “ Dajti Park 2007”
Kompania “Dajti Park 2007”, ka një histori të veçantë. Është krijuar në vitin 1999 nga Kujtim Qefalia, fillimisht me emrin “Qefalia shpk" .
Në vitin 2004, ai e ndryshon emrin e kompanisë, duke e quajtur “Vllaznimi”.
Në vitin 2007, ai u zgjodh kryetar i Komunës Dajt dhe u gjet në kushtet e konfliktit të interesave, Qefalia ia “dorëzoi” formalisht kompaninë shtetasit Ylber Kalaja.
Ajo e mbajti këtë emër deri në korrik 2016, kur, pas një hetimi të Prokurorisë për Krime të Rënda për korrupsionin me tenderat e ushqimeve në Drejtorinë e Përgjithshme të Burgjeve, në listën e të arrestuarve ishte edhe pronari i saj, Ylber Kalaja.
Vetëm një javë pas arrestimit,në kohën kur gjendej ende në paraburgim, Kalaja vendosi t'ia ndryshojë tërësisht emrin kompanisë, duke e quajtur “Dajti Park 2007”
Pasi qëndroi disa kohë në paraburgim, Kalaja u lirua nga burgu dhe hetimët ndaj tij u vijuan në gjendje të lirë.
Për më shumë se dy vjet, nga korrikut 2016 deri në fund të vitit 2018, administratori i “Dajti Park 2007” ka qenë fillimisht i arrestuar, më pasnë gjykim dhe përfundimisht i dënuar për veprën penale të “Korrupsionit”. Por kjo situatë nuk e kishte penguar aspak kompaninë e tij garojë dhe të jetë fitues në tendera publikë, me shifra shumëmilionëshe.
Por më e çuditshmja ndodh në fundin e 2018-s, kur Kalaja vendos ta dhurojë kompaninë e tij që gllabëronte para nga tenderat. Ai i dhuron 50 % të aksionëve djalit të tij Desart Kalasë dhe 50 %, tjetër ia kalon vëllait të Kujtim Qefalisë, që në vitin 2007 ia kishte dhënë Ylberit. Lulzim Qefalia përveç se është vëllai i Kujtim Qefalisë, ai është edhe vëllai i deputetit socialist Xhemal Qefalia.
Rikthimi në kompani i Qefalisë ka bërë që kjo kompani të fillojë të fitojë tendera me shifra stratosferike, jo se më parë nuk e kishtë bërë këtë gjë.
