Policia e ka zbuluar administratorin dhe i ka numrat telefonik të anëtarëve të grupit “Dhoma publike” të rrjetit social “Telegram” në të cilin janë publikuar përmbajtje pornografike të vajzave të mitura.
Byroja për Siguri Publike prej mbrëmë, pas zbulimit në opinion, ka ngritur hetim, në të cilin pritet që të zbulohen administratorët dhe anëtarët e grupit të mbyllur “Dhoma publike” në rrjetin social “Telegram”.
Portali A1on ka hyrë në “Dhomën publike” dhe ka mundur që t’i ndjekë komentet dhe fotografitë e shpërndara të mbi 7.400 anëtarëve, ndërkaq sipas numrave telefonik, aty ka pasur edhe ish funksionarë të lartë, menaxherë të kafeneve, gazetarë, biznesmenë. Pasi që publikisht është bërë i njohur grupi, atëherë rreth 600 anëtarë kanë dalë prej grupit, ndërkaq të tjerët kanë vazhduar të shpërndajnë përmbajtje pornografike, numra telefonik të vajzave dhe fotografi të zhveshura.
Sipas informatave të A1.on.mk, këtë grup e ka formuar një person i mitur, por me kalimin e kohës në grup janë kyçur edhe persona mbi 18 vjeç. Për rastin kanë alarmuar edhe profesorë të shkollave të mesme, zv/ministrja e Punëve të Brendshme, Sllavjanka Petrovska, e cila deklaroi se është hapur hetim për rastin, ndërkaq nga Komiteti i Helsinkit nesër do të dorëzohet padi deri te Sektori për Krim Kompjuterik në MPB.
