Mjekja kardiologe, Daniela Teferici ka dhënë një intervistë për 'Panorama', ku tregon se si ndikon marrja e ilaçeve ndaj gripit te personat që vuajnë nga zemra. Ajo thotë se virusi i gripit shpeshherë sjell komplikacione fatale dhe për pasojë duhet një kurim.
“Virusi i gripit është shumë i rrezikshëm dhe mund të sjellë komplikacione fatale. Mund të dëmtojë muskulin e zemrës, pra miokardin. Ka pasur raste kur edhe të rinj janë paraqitur në spital pas një episodi virol me muskulin e zemrës shumë të dëmtuar”, thotë mjekja kardiologe Daniela Teferici.
Ndërkohë, doktoresha shton se nëse te të sëmurët kardiakë trajtimi me medikamente është i gjatë, atëherë sjell pasoja negative. Ajo thekson se asnjëherë nuk duhet ekzagjeruar me dozën.
Një ndër pasojat negative është pakësimi i sasisë së gjakut në arteriet koronare.
“Te të sëmurët kardiakë, kur i zë gripi, nëse antiinflamatori merret për një kohë të shkurtër, pra nuk janë mjekime afatgjata, nuk shkakton ndonjë problem. Kur zgjat në kohë dhe ekzagjerohet me dozën, atëherë këto medikikamente sjellin pasoja negative, duke pakësuar sasinë e gjakut në arteriet koronare. Për rastet me insuficiencë kardiake, këto medikamente nuk rekomandohet që të merren”, vë në dukje më tej doktoresha.
