I është dhënë lamtumira e fundit aktorit të mirënjohur, Xhevdet Ferri, i cili u nda nga jeta ditën e djeshme në moshën 59-vjeçare.
Ai vuante nga një sëmundje e pashërueshme, ndërsa sot në mesditë u përcoll për në banesën e fundit, mes lotësh dhe dhimbjesh.
Aktorit të dhjetra roleve në kinematografinë shqiptare, iu dha lamtumira e fundit në një ceremoni familjare, pa homazhe zyrtare, por me pjesëmarrje shumë të madhe nga të gjithë ata që e deshën artin e tij të madh.
Familjarët e Ferrit nuk pranuan që homazhet të kryheshin në ministrinë e Kulturës dhe i zhvilluan në banesën e të ndjerit, që ndodhet në rrugën "Hoxha Tahsim" në Tiranë.
Të afërm, familjarë, miq e aktorë të njohur shqiptarë shoqëruan trupin e tij për t'u prehur drejt banesës së fundit.
Ferri la pas bashkëshorten, aktoren Rozeta Ferri dhe një vajzë. Pak kohë më parë ai ishte bërë edhe gjysh për herë të parë.
Po kush ishte Xhevdet Ferri?
Ai ishte aktor shqiptar, bashkëshort i aktores Rozeta Ferri me të cilën ka luajtur në shumë filma si Dhe vjen një ditë, Vitet e pritjes, Gjoleka djali i Abazit,etj. Filmi i tij i parë ka qenë kur ai ishte akoma një student. Xhevdet Ferri u nda nga jeta në moshën 59-vjeçare prej një sëmundjeje të pashërueshme.
Në 1982 diplomohet në Akademinë e Arteve dega e dramës dhe më pas mbetet pedagog i mjeshtërisë së aktorit në këtë Akademi. Vazhdon karrierën akademike deri në detyrën si Dekan i Fakultetit të Artit Dramatik pranë kësaj Akademive. Ka interpretuar në rreth 30 role në kinematografi e teatër. Në teatër ka interpretuar pak role, por suksesin me te madh si aktor ai e ka arritur ne filmin artistik (rreth 13 role).
Pothuajse në të gjitha filmat ka qenë në rolin e protagonistit deputon në vitin 1980 ne “Skëterrë ’43” si Arjani dhe po atë vit në “Vëllezër dhe shokë” duke rënë në sy për rolin e Markos.
5 vjet më vonë në vitin 1985 do të bëhet i njohur me interpretimin e rolit të Agronit në filmin e dytë të tij “Hije që mbeten pas”. Në mishërimin që i bëri figurës se Gorit në filmin tjetër “Dhe vjen një dite”, me të cilin u nderua me medaljonin e festivalit, me 1986, bie ne sy cilësi te tjera interpretive si natyrshmëria, qetësia dhe thjeshtësia shoqëruar nga karakteri drejtpërdrejt i të vepruarit. U dallua për një individualitet të veçantë aktoresk.
Role të tjera të spikatura për aktorin Xhevdet Ferri janë edhe ai i e Pali në “Besa e kuqe” (1982); Sandri në “Vendimi” (1984); Trimi në “Përrallë nga e kaluara” (1987); Martini në “Treni niset në 7 pa pesë” (1988); Gjon Kadri ne “Vitet e pritjes” (1990); Me rolin e Sakos, në filmin “Dasma e Sakos” (1998), Xhevdet Ferri arrin sërish në një pikë të lartë artistike të interpretimit.
Nga vitet 1995-1999 ishte drejtor i Qendrës Kombëtare të Kinematografisë, duke e marrë sërish këtë post në vitin 2006. Ndërsa në vitet 1999-2001 ishte drejtor i Teatrit Kombëtar. Është specializuar në fushën e “Menaxhimit të Institucioneve Artistike” në Amsterdam e Oxford. Në periudhën kohore 1996 – 1998 ishte deputet i PD-se në Kuvendin popullor. Në vitin 2004 është bashkëthemelues i Shoqatës së Kineastëve Shqiptarë duke qenë edhe Kryetari i pare i kësaj Shoqate.
