Zëri i Amerikës ka pasqyruar ditën e sotme një ngjarje që ndodhi në mëngjes, ku mbetën të plagosur kryetari i Bashkisë së Lushnjës, Fatos Tushe dhe sekretarja e tij Erisa Qalliu.
Lëndimi i tyre erdhi si pasojë e shpërthimit të një granate në mjediset e zyrës së drejtuesit lokal të qytetit.
Kujtojmë se autor i kësaj ngjarjeje thuhet të jetë Gëzim Saraçi, ish-shoferi i zotit Tushe, i cili mendohet të ketë pasur konflikt me kryetarin e bashkisë.
Ndërkohë ende nuk dihen motivet e sakta, por një nga dyshimet e para është pikërisht pushimi nga puna e ish-shoferit.
'Policia njoftoi se ka nisur kontrolle të shumta në zonë, përfshirë njësitë e forcave speciale, për kapjen e Saraçit', thuhet në shkrim.
Shkrimi i VOA:
Kryetari i Bashkisë së Lushnjës, Fatos Tushe, dhe sekretarja e tij Erisa Qalliu mbetën sot të plagosur si pasojë e shpërthimit të një granate në mjediset e zyrës së drejtuesit lokal të qytetit. Mjeti shpërthyes mësohet të jetë hedhur nga Gëzim Saraçi, ish-shoferi i zotit Tushe.
Kryebashkiaku dhe sekretarja e tij u dërguan menjëherë në spitalin e Traumës në Tiranë. Mjekët deklaruan se zoti Tushe ka patur dëmtime të lehta, vetëm në kraharor, ndërsa zonja Qalliu, ka pësuar dëmtime të kockave në fytyrë, por është jashtë rrezikut për jetën.
Motivet janë ende të paqarta. Një nga pistat e hetimit është ajo e pushimit të Saraçit nga puna, ndonëse e ndodhur më shumë se dy vjet më parë, por nuk përjashtohen dhe shkaqe që nuk lidhen me marrëdhënie thjesht institucionale. Sipas asaj që kanë treguar dëshmitarë okularë, referuar mediave lokale, të dy kanë qenë duke debatuar përpara Bashkisë për çështje parash, ndërsa janë ngjitur me pas drejt zyrës së kryebashkiakut.
Policia njoftoi se ka nisur kontrolle të shumta në zonë, përfshirë njësitë e forcave speciale, për kapjen e Saraçit.
