Një ngjarje e rëndë ndodhi mëngjesin e sotëm në Lushnjë, ku një 50-vjeçar hodhi një granatë në zyrën e kryebashkiakut të qytetit, Fatos Tushe, duke e lënë të plagosur.
Nga shpërthimi i granatës mbeti e plagosur edhe sekretarja e kryebashkiakut, Erisa Qalliu, e cila mori lëndime të rënda në kockat e tyre.
Së fundmi, policia ka publikuar foton e 50-vjeçarit Gëzim Saraçi, i cili kishte punuar për disa vite si shofer i Tushes.
Policia njofton se jep shpërblim prej 1 milionë lekësh të rinj për këdo që do të japë informacion të saktë për lokalizimin dhe kapjen e autorit.
Dyshohet se 50-vjeçari ndodhet i fshehur në territorin e Qarkut të Beratit.
Njoftimi i policisë:
Në lidhje me ngjarjen e ndodhur në Bashkinë e Lushnjës, ku shtetasi Gëzim Saraçi, 50 vjeç, hodhi në zyrën e Kryetarit të Bashkisë Lushnjë një granatë dore dhe për pasojë u plagosën jashtë rrezikut për jetën Kryetari i Bashkisë F. T. dhe sekretarja e Bashkisë shtetasja E. Q., ju informojmë se forcat speciale Renea, FNSH-ja e Fierit, shërbimet e Komisariatit të Policisë Lushnjë dhe të DVP Fier vijojnë krehjen e zonës, për kapjen e autorit të kësaj ngjarjeje.
Autori i kësaj ngjarjeje ka mundur të largohet menjëherë pas ngjarjes dhe dyshohet se është fshehur në territorin e qarkut Berat.
Me qëllim kapjen sa më shpejt të tij, Policia e Shtetit kërkon bashkëpunimin e qytetarëve dhe vë në dispozicion 1 milionë lekë të rinj për çdo informacion të saktë që do çojë në lokalizimin dhe kapjen e autorit.
Për çdo informacion sado të vlefshëm, qytetarët të telefonojnë në numrin unik 112 apo të dërgojnë imazhe në Komisariatin Dixhital, si dhe në numrin e celularit 069 41 07 337, duke ju garantuar anonimat të plotë dhe reagim të menjëhershëm të strukturave të Policisë për të kapur dhe vënë para përgjegjësisë ligjore autorin e kësaj ngjarjeje.