Futbolli shqiptar ka marrë sot një lajm të trishtë, teksa është ndarë nga jeta në moshën 89-vjeçare një nga figurat më të shquara të këtij sporti në vendin tonë, Shyqyri Rreli.
Ish-futbollisti dhe trajneri i shquar ka qenë një nga emrat më të njohur të futbollit shqiptar ndër vite dhe për këtë ka marrë edhe dekoratën “Nderi i Kombit” dy vite më parë.
Ish-mesfushori i cili spikati me Dinamon, bëri emër sidomos me karrierën e tij si trajner, fillimisht me ekipin e U21 të Shqipërisë, duke arritur ta çonte deri mes 8 më të mirëve në Europë, pa harruar këtu dy turnetë ballkanikë të fituar.
Më pas, në drejtimin e Kombëtaren A, ai ishte i pari që iu afrua kualifikimit në një turne madhor, në kualifikueset e Botërorit 1986, duke marrë asokohe një fitore ndaj Belgjikës dhe barazime kundër Polonisë dhe Greqisë.