Ka dalë nga spitali i Traumës kryetari i Bashkisë së Lushnjes, Fatos Tushe. Paraprakisht ai mësohet se ka lënë spitalin pak pas mesditës së sotme dhe ka dalë nga dera e pasme e institucionit shëndetësor, për të mos pasur kontakt me kamerat dhe gazetarët.
Ndërkohë, në gjendje më kritike ndodhet sekretarja e tij. Erisa Qalliu po i nënshtrohet një ndërhyrje kirugjikale në Spitalin e Traumës pas dëmeve që mori nga shpërthimi i granatës.
Në një deklaratë për mediat, nëndrejtori i Spitalit të Traumës, Vilson Ruçi tha se Qalliu ka marrë dëmtime në duar dhe këmbë, si dhe në kockat e fytyrës. Gjithashtu shtoi se ajo do ketë nevojë për ndërhyrje të tjera për shkak të dëmtimeve në gishtat e këmbës dhe dorës.
Në vijim ai bëri me dije se kryebashkiaku Tushe ka bërë vetëm një skaner për të pasur sigurinë se asnjë prej ciflave të granatës nuk ka përfunduar në trupin e tij. Pasi është konstatuar gjendje e mirë shëndetësore për Tushen, ky i fundit ka lënë spitalin.
Kujtojmë se ka qenë ish-shoferi i kryebashkiakut, Gëzim Saraçi, ai që dyshohet se ka hedhur një granatë në derën e zyrës së Kryetarit të bashkisë Lushnje. Gjithçka ka ardhur pasi kreu i bashkisë e ka pushuar atë nga puna. Siç është thënë deri më tani, e dëmtuara kryesore nga kjo ngjarje është sekretarja e Fatos Tushes.
