PDSH është më afër koalicionimit me LSDM-në sesa me partitë politike shqiptare. Kështu ka deklaruar kryetari i kësaj partie, Menduh Thaçi. Thaçi tha se është i pamundur një koalicionim me Lëvizjen BESA dhe me Aleancën për Shqiptarët, duke potencuar se në zgjedhjet e ardhshme do të luftojë për t'i fituar ata.
“Unë nuk bëj pjesë në grupin e politikanëve që sillen me oportunizëm. Situatat janë shumë më të qarta, pas asaj që kemi punuar me kryeministrin dhe liderin e LSDM-së ne shohim gatishmëri shumë më të madhe tek ai që të bisedojmë të gjitha temat të cilat janë të hapura. Pa eliminuar meritat e kryeministrit Zaev për de bllokimin e procesit integrues dhe mendojmë shumë më afër jemi që të bisedojmë edhe më tutje edhe me kryeministrin edhe me LSDM-në”, tha Thaçi.
Ndërkaq nga ana tjetër, Partia politike Alternativa e drejtuar nga Afrim Gashi ka bërë me dije se janë duke negociuar për një koalicion parazgjedhor me Aleancën për Shqiptarët. Lideri i kësaj partie, Afrim Gashi për Sllobodna Tv ka deklaruar se koalicioni pritet të bëhet publik nga mesi i janarit të vitit 2020. “Ne përpiqemi të shkojmë në koalicion. Bisedojmë tash me partitë politike shqiptare. Shumë afër jemi që të merremi vesh. Do të shohim deri në fillim të janarit. Ndoshta edhe nga mesi do të publikojmë. Ende rrjedhin bisedimet”, tha Afrim Gashi, kryetar i Alternativës.
