Malaj sjell me këmbë në tokë Ramën: Rritja ekonomike në vitin 2020, më e ulët se pritshmëritë e qeverisë

Ish-ministri i Financave, Arben Malaj, i cili me urdhër të Ramës u shkarkua nga Bordi i Bankës së Shqipërisë pak ditë më parë, ka bërë një parashikim të zymtë sa i përket pritshmërive ekonomike për vitin 2020.

I ftuar në "Abc News", Malaj theksoi se ekonomia shqiptare parashikohet të jetë me e ulët sesa pritshmëritë e qeverisë për një rritje prej 4% dhe se do të përbalet me një sërë sfidash gjatë 2020-s.

Sipas tij, parashikimet e bëra nga institucionet nuk kanë qenë asnjëherë realiste dhe se ekonomia jonë prej kohësh po performon nën kapacitetin e saj.

Ai tha:

Ekonomia po performon nën kapacitetin e saj, duhet të jetë në kapacitet të plotë për të ringritur ekonomike dhe për të përballuar buxhetet sociale."

Teksa foli për rindërtimin e ndërtesave të shkatërruara dhe dëmtuara nga tërmeti i 26 nëntorit, Malaj theksoi se nëse ky proces ka transparencë, mund të sjellë përmirësim të ekonomisë.

Ai vijoi:

Rindërtimi në vetvete nëse vleresohet kredibiliteti i donatorëve, nëse përzgjidhen me përgjegjësi kostot, mund të japë rezultate pozitive nga gjysma e dytë e vitit 2020."

I njohur edhe si një nga ekspertët më të mirë në vend në ekonomi, Malaj iu sugjeron autoriteteve të kenë shumë kujdes me klimën e biznesit dhe të shlyhen detyrimet e prapambetura.

Ish-ministri shtoi:

E para është përmirësimi i pritshmërive, e dyta buxheti realist, e treta rritja e eficensës për çdo qindarke, të hiqet dorë nga gjobat, një ambiente miqësor me biznesin, të ristrukturohen detyrimet që qeveria mund të ketë ndaj biznesit."

Ndërkohë, vlen të theksohet se edhe institucionet ndërkombëtare financiare e kanë ulur pritshmërinë epër rritjen ekonomike të Shqipërisë në 2020.