Pas lirimit të Hasan Kanacit, një prej të arrestuarve të grabitjes spektakolare në Rinas për "mungesë provash", një tjetër lirim i bujshëm ka ndodhur gjatë ditës së sotme.
Është mësuar se Gjykata e Elbasanit ka liruar nga burgu Viktor Ymerin, i cili njihet si një ndër personat më problematikë në qytetin e Vlorës, ndërsa akuzohet si i përfshirë në dy vrasje.
Vendimi është dhënë nga gjyqtarja Enkeleda Kapedani, ndërsa burime pranë Drejtorisë së Burgjeve kanë konfirmuar për "News24", se Ymeri ka lënë qelinë gjatë ditës së sotme.
Ndërkohë, Prokuroria e Elbasanit nuk është pajtuar me këtë vendim dhe ka vendosur ta apelojë.
Sipas Prokurorisë, gjykata nuk e ka zbatuar siç duhet ligjin, pasi ka përllogaritur si ditë dënimi, ditët e punës të kryera në burg.
Lirimi i Ymerit, i cili është daja i Edison Harizajt, që u ekzetua gjatë një atentati në Durrës, vjen në një kohër kur vendimi tjetër gjyqësor që pranon si ditë burgu, ditët e punës, është ankimuar, por Gjykata e Apelit ende nuk ka dhënë verdiktin e saj.
Kush është Viktor Ymeri Viktor Ymeri njihet si një nga njerëzit problematikë në Vlorë, dhe që ka lidhje miqësie e farefisnie me Edison Harizaj, i ekzekutuar para disa ditësh në Durrës. Në të njëjtën kohë Viktor Ymeri konsiderohej nga policia dhe prokuroria si një nga njerëzit më të afërt të Gazmend Brakës, (Gaxhait) i dënuar me burgim përjetë, pasi së bashku në qershor të vitit 1999, kanë ekzekutuar me dhjetra plumba kallashnikovi Arben Pajën dhe Ilir Xhungën, të cilët ishin pjesë e një fraksioni tjetër kriminal në Durrës.
Fillimisht Paja dhe Xhunga të cilët po udhëtonin me një furgon tip “Citroen” në afërsi të Drejtorisë së Policisë Durrës, janë qëlluar me një predhë kundërtanku, e cila edhe pse ka prekur parakolpin e furgonit, fatmirësisht nuk ka plasur. Pas kësaj, mbi Pajën dhe Xhungën janë derdhur breshëri automatiku kallashnikovi, të cilat vinin nga katër krahë, duke i lënë të vdekur në vend.
Për këtë ngjarje policia e Durrësit në atë kohë arrestoi brenda shtëpisë së një doktori në Durrës, Gazmend Brakën dhe Viktor Ymerin. Sipas burimeve nga policia e Vlorës dyshohet se Ymeri të jetë dhe daja i Edison Harizaj, i vrarë me rreth 50 plumba në ngjarjen e 7 nëntorit 2018 në zonën e Plepave në Durrës. Harizaj dhe shoku i tij Genci Caci u qëlluan vetëm 7 ditë pasi Gjykata e Apelit në Durrës projektoi lirimin nga qelia të të afërmit të tyre Viktor Ymeri, për të cilin në 31 tetor 2018, ka vendosur ti rrëzojë dënimin me burgim të përjetshëm të dhënë në 23 qershor 2017 nga gjykata e Durrësit, dhe ta dënojë atë përfundimisht me 25 vite burgim.
Vendimi i Gjykatës së Apelit që e ktheu burgimin e përjetshëm në 25 vite burg Mirëpo koha e përllogaritjes së shlyerjes së këtij dënimi, sipas gjykatës së Apelit, Viktor Ymerit, i fillon në 29 qershor 1999, dhe që prej kësaj dite e deri më tani, pjesa më e madhe e dënimit prej 25 viteve burgim thuajse se është kryer.
