Shumë banorë në Urën Vajgurore të Beratit kanë mbetur pa banesa nga dëmet që shkaktoi tërmeti i 26 nëntorit.
Për më tepër, ata po përballen edhe me përmbytjet nga reshjet e shiut.
Familja Totaj nga Ura Vajgurore, jeton në kushte të vështira ekonomike në një banesë modeste, shkruan abcnews.al.
Kryefamiljari tregon pamjet e banesës së tij, ku duket e qartë çarja e rënia e mureve, por edhe e tavanit.
Gjithashtu, ai theksoi se së bashku me familjen nuk munden të jetojnë dot më në çadër, pasi futet uji brenda.
“Na kanë sjellë një çadër, por ajo mban ujë. Nuk di çfarë të them”, shprehet Reshat Totaj.
Banesa e familjes Totaj është një nga 5 banesat e vlerësuara si të pabanueshme në këtë zonë të Urës Vajgurore.