Tifozët e Milanit vazhdojnë të jetojnë me makthin që i shkakton ekipi i tyre i zemrës nga java në javë. Sot kuqezinjtë janë shpërfytyruar nga Atalanta me rezultatin 5-0 duke bërë një paraqitje skandaloze.
Bergameskët e nisën mjaft mirë ndeshjen, teksa kaluan në avantazh që në minutën e 10’ të takimit, duke gjetur rrugën e rrjetës me anë të Papu Gomez.
Rezultati u dyfishua nga Mario Pasalic, i cili shënonte në minutën e 61’, për t’i dhënë tjetër goditje milanistëve.
Vetëm dy minuta më vonë, Josip Ilicic shënoi për 3-0, duke i dhënë fund dilemës për fituesin në këtë takim. I njëjti lojtar shënoi një super gol në minutën e 72’, duke e çuar rezultatin në 4-0.
Rezultatin final dhe turpërimin e madh të Milanit në këtë ndeshje e vendosi Luis Muriel, duke dërguar topin në rrjetë në minutën e 83′ për 5-0.
Me këtë fitore, Atalanta numëron tashmë 31 pikë dhe e sheh veten në vendin e pestë në klasifikim, kurse Milan mbetet në kuotën e 21 pikëve, në vendin e 10-të, por me 1000 halle mbi supe, teksa askush nuk e di se kur do të dalë ky ekip nga kriza.