Ditën e sotme, një prej personazheve më të njohur të ekraneve për shkak të sjelljes së tij, Hermes Nikaj, është vënë në pranga nga Policia e Tiranës.
Hermes Nikaj, ishte prej një viti në monitorim nga policia për shkak se dyshohej se bënte pjesë në një grup që rekrutonte prostituta.
Bashkë me disa femra të tjera ai u vu në pranga për akuzat “shfrytëzim prostitucioni” dhe “Prostitucion” nga Prokuroria e Tiranës.
Nikaj rezulton se ishte administrator i prostitutave, siguronte vajza të ndryshme për klientë të interesuar, duke i dërguar ato në banesa ose hotelet sipas kërkesave të klientëve kundrejt përfitimit monetar që varionte nga 10.000 deri 20.000 lekë për 2 orë.
Rezulton se Nikaj përfshihej edhe vetë në marrëdhënie seksuale në grup.
28-vjeçari u arrestua në ambientet e një hoteli në autostradën “Tiranë-Durrës“ në flagrancë së bashku me:
– A. Gj., 47 vjeç, banues në Mamurras-Kurbin, i dyshuar për kryerjen e veprës penale të “Prostitucionit”.
Në kuadër të këtij operacioni më datë 09.11.2019, janë arrestuar në flagrancë edhe shtetasit:
– A. B., 43 vjeçe, banuese në Tiranë, e dyshuar për kryerjen e veprës penale të “Shfrytëzimit të prostitucionit”.
– A. N., 43 vjeç, lindur në Fier dhe banues në Kanada, i dyshuar për kryerjen e veprës penale të “Prostitucionit”.
Një 32-vjeçare dhe një 20-vjeçare janë proceduar në gjendje të lirë të dyshuara se kryenin veprën penale të “Prostitucionit”.
Njëra prej grave me inicialet A. B., nëpërmjet qendrës së saj estetike fillimisht punësonte femra si kursante ose si parukiere dhe më pas i rekrutonte ato për prostitucion duke i dërguar ato në banesa ose hotelet sipas kërkesave të klientëve kundrejt përfitimit monetar që varionte nga 500 deri në 700 Euro nata.
Nga hetimet e deritanishme ka rezultuar se ka pasur edhe shumë raste të tjera që shtetasit e lartpërmendur kanë dërguar femra në hotele dhe banesa të ndryshme në qytetin e Tiranës dhe qytete të tjera, ku po punohet për dokumentimin e tyre.
Në cilësinë e provës materiale u sekuestruan 2 fuoristrada të markës BMW, 10 aparate celular të markës I-Phone, Black Berry, Samsung dhe LG, dhe një sasi lekësh, euro dhe dollarë.
