U rikthye pas 56 vitesh në qeli, rrëfimi prekës i kardinal Troshanit

Pas 56 vitesh, kardinali katolik, Ernest Troshani, është rikthyer në qelinë në të cilën vuajti torturat nga regjimi komunist në ish-burgun e Shkodrës, që sot është kthyer në Muzeun e Dëshmisë dhe Kujtesës.

Troshani shoqërohej nga zyrtarë të Departamentit Amerikan të Shtetit, të cilët kishin zgjedhur Shkodrën për të vizituar objektet e kultit. Ai kaloi plot 25 vite në burgjet e diktaturës komuniste, ndërsa sot iu rikthye kujtimeve të errëta, të periudhës më të vështirë që ka përjetuar në jetën e tij.

Pavarësisht torturave, ai nuk u përkul asnjëherë dhe e vetmja gjë e ka shoqëruar gjatë gjithë kohës është lutja.

91-vjeçari u dënua në vitin 1963 me 25 vite burg nga sistemi komunist, pasi mbajti një meshë dedikuar vdekjes së ish-presidentit amerikan, John F. Kennedy.

Ai rrëfen:

Jam lutur, vetëm lutje. Vetëm jam lutur pa pushim. Kështu na ka porositur Krishti."

Më tej ai tregoi edhe momentin e arrestimit.

Ai shtoi:

Më erdhën në Barbullush, më vunë prangat, me dekretin për të më varur në litar, për arsye se mbajta meshë për vdekjen e presidentit amerikan Kennedy."

Pavarësisht se u dënua nga regjimi komunist, kardinali Troshani tregoi se është lutur edhe për diktatorin Hoxha, që Zoti t'i ndriçojë mendjen,

91-vjeçari shprehet:

Jam lutur edhe për Enverin. T'ja ndriçojë Zoti mendjen, për të ushqyer popullin që po vuante shumë, ashtu siç e dinë të gjithë, për të mirën dhe begatinë e popullit e gjithë popullit shqiptar."