Amarilda Leka, juristja 36-vjeçare e lindur në Përmet është arrestuar ditën e sotme nga policia e Tiranës.
Leka është arrestuar pas një akuze të ngritur ndaj saj nga një qytetar të cilit i ka marrë rreth 24 mijë euro, duke i premtuar se do i nxirrte familjarin e tij nga burgu.
Po kush është Amarilda Leka dhe si e ushtronte profesionin?
Juristja Leka mashtronte qytetarët duke ju thënë se ishte nusja e djalit të ish-ministrit Luan Hajdaraga, gjithashtu shtonte se kishte lidhje me Gjyqtarë të Krimeve të Rënda, duke i bindur se ishte një juriste e zonja.
Amarilda Leka ra në duart e policisë disa vite më parë pasi ka mashtruar familjarët e një të paraburgosuri se punonte si juriste pranë Gjykatës së Lartë të Tiranës dhe me njohjet e saj do të ndërhynte tek gjyqtari i çështjes me qëllim për të ndikuar në uljen e dënimit. Në këtë mënyrë Amarilda Leka ju ka marrë 24,500 euro familjarëve të të paraburgosurit.
Sipas Prokurorisë, në atë kohë Leka prezantohej si nusja e djalit të ish-ministrit të Mbrojtjes. Madje ajo ka qenë ish-sekretare në shtabin elektoral të ministres Milena Harito.
Familjarët e të paraburgosurit, pasi konstatuan se ishin mashtruar kanë kontaktuar me juristen Leka, duke i kërkuar që t'i kthente shumën e sipërpërmendur mbrapsht. Kjo e ka shtyrë atë të bëjë një kallëzim në polici, sikur është kërcënuar nga familjarët e të paraburgosurit.
Leka në kallëzimin e bërë ka deklaruar se shtetasi Zef Gjoka është vëllai i një personi të arrestuar për vepra penale në fushën e narkotikëve, ka ushtruar dhunë ndaj saj dhe prindërve të saj.
Por, nga përgjimet e bëra nga Prokuroria shtetasja Amarilda ka gënjyer lidhur me rrethanat e kallëzuara prej saj.
Këto para sipas prokurorisë, ajo i shpenzonte për jetë luksi pasi asgjë nuk ndryshonte nga vendimi i gjyqtarëve.
