Aktivisti i shoqërisë civile Adriatik Lapaj ka publikuar në profilin e tij në rrjetet sociale foton e një gruaje. Pamja e kësaj gruaje të ‘’ther në shpirt’’.
E themi këtë, pasi ajo ështe duke kullotur delet e saj në mes të shiut dhe mbi supe ka hedhur një plasmas të bardhë. Lapaj shkruan se këtë foto e ka bërë në fushat e Delvinës buzë rrugës.
Krahas fotos që ai ka postuar ka bërë edhe një postim në rrjetet sociale. Ai shkruan se nëna e mbuluar me plasmas përveç të gjitha vështirësive duhet t’i paguajë buxhetit të shtetit tonë 500 lekë të reja për çdo krer dele rudë për kullotën që përdor.
Postimi i plotë:
NËNA QË NUK I MËSOVA DOT EMRIN Aty në fushat e Delvinës buzë rrugës nën rrebeshin e shiut pashë një nënë që ruante delet rudë. Ishte mbuluar me një plasmas të bardhë që mu duk mbështjella më e çiltër, bukur mbretërore që kisha parë ndër viset tona. Në kokë mbante shaminë e bardhë të nënave tona. Sytë i kishte plot dashuri. Buzëqeshi tek i kërkuam ti bëjmë këtë fotografi. Te zëri dhe shikimi i saj gjeta aq shumë mirësi. Nëna përveç të gjitha vështirësive duhet ti paguaj buxhetit të shtetit tonë 500 lekë të reja për çdo krer dele rudë për kullotën që përdor. Gjithësesi nuk dua të ndalem te trishtimi, por te dinjiteti i punës së saj. Në fund i zgjatëm 1 kokërr mollë e ajo e mbylli me fjalën “Faleminderit bij e rruga e mbarë!’’Ika me pyetjen ndaj vetes: Kur nuk do i taksojmë deri në mundim njerëzit e munduar të këtij vendi ndërkohë që një pakic tallet me mundin e nënave tona?
