Kryeministri aktual i Maqedonisë së Veriut, Zoran Zaev pritet të japë dorëheqjen pas marrjes së një përgjigjeje negative nga vendet e Bashkimit Europian për hapjen e negociatave. Maqedonia e Veriut dhe Shqipëria ishin dy vendet që dolën me kokën poshtë nga samiti dy ditor.
Pas qarkullimit të fjalëve për largimin e Zaev nga posti i Kryeministrit, në shtetin fqinj kanë nisur të dalin fjalët dhe hamendësimet në lidhje me personin që do të zëvendësojë kreun e qeverisë.
Sipas burimeve të agjencisë “Zhurnal”, kryeministri Zaev do të zëvendësohet nga ministri i tanishëm i Punëve të Brendshme, Oliver Spasovski. Ky i fundit mund të udhëheqë qeverinë deri në përfundimin e mandatit të plotë, që përkon me fundin e vitit të ardhshëm.
Kryeministri Zaev gjendet ende në Bruksel, nga ku pritet të komunikohet zyrtarisht verdikti i Këshillit Evropian mbi nisjen e bisedimeve me Shqipërinë dhe Maqedoninë e Veriut. Sipas gjasave, Zaev do të kumtojë vendimin përmes një konferencë për shtyp, pasi të kthehet në vendin e tij.
