Italia i ka dhënë një "shuplakë" të fortë qeverisë shqiptare.
Ndonëse nga emigrantët shqiptarë në Itali, por jo vetëm, mezi pritej njohja e lejeve të drejtimit pas marrëveshjes së firmosur në 14 gusht mes qeverisë shqiptare dhe asaj italiane, e cila pritej të hynte në fuqi në 8 shtator, mesa duket gjithçka do të mbetet vetëm në letra, pavarësisht propagandës së madhe që iu bë gjatë muajit gusht.
Kjo pasi qeveria italiane ka publikuar një dokument ku shpjegon me detaje rrugën që duhet të ndiqet për të përfituar, kush do të jenë përfituesit, si dhe sasinë e parave që duhet të paguajnë.
Nga qeveria shqiptare u tha se të vetmit që do përfitonin ishin ata persona që ishin pajisur me modelin e ri të lejeve të drejtimit të lëshuara nga janari i vitit 2017.
Por në të vërtetë, qytetarët shqiptarë që banojnë në Itali prej më shumë se 20 vitesh dhe kanë në dorë patentën e re, përballen me problematike të shumta.
Në dokumentin e publikuar nga Ministria italiane e Transportit, të drejtën për të përfituar njohjen e patentave do ta kenë vetëm emigrantët që janë rezident tre vitet e fundit dhe janë të punësuar me kontratë, numri i të cilëve është i paktë.
Mirëpo Italia prej më shumë se pesë vitesh po përjeton një krizë të madhe në tregun e punës dhe në këtë situatë punëtorët janë pa kontrata të rregullta, gjë e cila penalizon shqiptarët.
Rreth 500 mijë shqiptarë në Itali janë të pajisur me patenta të para viteve 2015. Rregullat e reja të vendosura nga qeveria italiane përjashtojnë automatikisht emigrantët shqiptarë në Itali.
Gjithashtu për njohjen e lejes së drejtimit me Italinë është vendosur një kosto financiare shtesë që shkon mbi 500 euro.
Por nuk mbaron me kaq, kjo kosto rritet ndjeshëm për ata që kanë leje drejtimi të lëshuara para vitit 2017.
Lajmi më i keq është se të njëjtin fat do ta kenë edhe automjeteve shqiptare që punojnë në Greqi, pasi e njëjta marrëveshje është firmosur edhe me palën greke.
