Fondi Monetar Ndërkombëtar prej kohësh ka kundërshtuar modelin ekonomik të ndjekur nga qeveria shqiptare. Projekti më i fundi ishte krijimi i Korporatës së Investimeve Shqiptare, projektligji i së cilës ka kaluar në Kuvend.
FMN ka dalë hapur kundër krijimit të kësaj Korporatës, ndërsa në raportin e fundit i ka kërkuar me forcë qeverisë shqiptare që të rishikojë propozimin, shkruan Exit. Korporata është de facto privatizim i pronave publike në favor të klientëve, duke shmangur çdo standart.
Sipas FMN, nëse ky ligj miratohet do të ketë rreziqe të shumta për buxhetin e shtetit. Në raportin e FMN thuhet se forma që i është dhënë korporatës, bën që ajo të jetë e kontrolluar nga qeveria, por që përjashtohet përgjegjesia për menaxhimin buxhetor. Kjo do të gërryente disiplinën fisjale dhe do të anashkalonte procesin e menaxhimit të investimeve publike.
Gjithashtu FMN i ka sugjeruar qeverisë, që të përcaktojë qartë kontributin financiar që do të ketë në korporatë, ndërsa kjo e fundit t'i nështrohet ligjit të prokurimit publik. Në projektligjin e qeverisë, vetëm Këshilli i Ministrave ka të drejtë të përcaktojë rregulla të posaçme për prokurimet e koorporatës.
FMN ndër të tjera shton se korporata duhet të jetë e pavarur në vendimarrje nga qeveria dhe s'duhet përdorur për interesa të tjera nga qeveria.
