“Vrasja e babait ishte politike, kemi rezerva për policinë”

Deputeti i ndjerë i Partisë Socialiste Fatmir Xhindi u vra në rrethana të panjohura në 3 maj të vitit 2009. Edhe pse kanë kaluar 10 vite nga humbja e tij, djali i Xhindit kërkon drejtësi për babain e tij.

Ditën e djeshme u mbushën plot dhjetë vite nga humbja e deputetit Fatmir Xhindi, e ndërsa i biri Anduel Xhindi është sot deputet i Partisë Socialiste. Ai është shprehur se ka rezerva për punën e bërë asokohe nga Policia dhe se vrasja e babait të tij ka ndodhur për shkaqe politike.

Këtë e thotë me bindje pasi konflikte të tjera nuk kanë pasur.

Anduel Xhindi shprehet në emisionin “Kjo Javë”:

Kemi rezervat tona edhe me punën e policisë asokohe gjatë veprimeve të ndërmarra për krehjen e zonës. Për mënyrën sesi është proceduar nga policia atë natë dhe në vazhdim. Ne vetë si familjarë, shumë pranë shtëpisë sonë, kohë më vonë kemi gjatur një krehër kallashnikovi. Po të mos e kishim gjetur ne aty do të ishte akoma.”

Ai u shpreh se vrasja e të atit është bërë për shkaqe politike, pasi nuk ka pasur asnjë konflikt tjetër.

Ai shton:

S’kemi pasur asnjë konflikt, personal. Nuk kemi pasur konflikte pronash. Pista e vetme është ajo politike, por nuk mund të vendos gishtin. Presim që drejtësia e re të thotë fjalën e saj.”

Ish-deputeti socialist Fatmir Xhindi u vra tek dera e shtëpisë së tij në Roskovec. Ai ishte duke parkuar makinën tek oborri i shtëpisë kur u qëllua me breshëri plumbash.

Fatmir Xhindi, baba i tre fëmijëve, ishte një nga themeluesit e PS në qarkun e Fierit. Nga viti 1997, për tre legjislatura radhazi, ai ka qënë deputet në këtë zonë. Djali tjetër i tij, Anduel Xhindi është deputet i PS në Kuvend.