Goditi gruan me sopatë në kokë teksa flinte, rrëfehet burri: Më tradhtonte me komshiun

63-vjeçari Skënder Hoxha pranoi dje autorësinë mbi vrasjen e bashkëshortes së tij 53-vjeçare Antoneta Hoxha me të cilën kishte 30 vite që jetonte. Ngjarja e rëndë ndodhi në fshatin Vagalat të Memaliajt disa ditë më parë.

Sipas atyre që raportohen, çifti kishte patur një debat mbrëmjen e djeshme, që degjeneroi në dhunë fizike.

Edhe pse me fraktura të rënda në trup, ajo vazhdonte të ishte gjallë dhe i kishte kërkuar ndihmë bashkëshortit ta shpëtonte. I vendosur për ta lënë të vdiste, Hoxha nuk ka pranuar t’i vinte në ndihmë. Ajo u gjet e larë në gjak në katin e dytë të banesës ku jetonte, fillimisht nga të afërmit dhe komshinjtë të cilët kanë hyrë të parët aty në orën 04:00 të mëngjesit.

Hoxha e ka raportuar si një vrasje nga njerëz jashtë familjes. Ai ka dëshmuar se dyshonte se ajo e tradhtonte me komshiun e tyre me iniciale S.H.

Në raportin e policisë, të siguruar nga Dosja.al, zbulohet ngjarja makabre, mënyra si Skënderi vrau Antonetën me bishtin e sopatës, në dhomën e gjumit, kur ajo flinte gjumë, mëngjesin e 30 prillit 2019.

Vrasja e Antoneta Hoxhës ndodhi në orën 00:30, me bishtin e sopatës

Në raport thuhet se pas vrasjes, viktima është e gjetur e mbuluar në gjak, e veshur me rroba shtëpie, dhe me një litar gjaku të mpiksur në trup.

Në raport thuhet:

Kohët e fundit, Skënder Hoxha, ka dyshuar se gruaja e tij kishte lidhje jashtë martesore me shtetasin S.H. Më datë 30 prill, ora 00:30, kur Antoneta ishte në gjumë, ai ka marrë sopatën që kishte jashtë shtëpisë tek drutë, ka shkuar në dhomën e gjumit ku po flinte Antoneta, dhe e ka goditur 2 herë në anën e majtë të kokës, sipër veshit, me myqën e sopatës. Ai ka parë që me dy goditjet e para, Antoneta nuk po vdiste dhe po i dilte gjak nga goja dhe veshi e po përpëlitej në krevat. Në këtë kohë e ka goditur edhe njëherë tjetër me myqën e sopatën mbrapa kokës. Pasi ka konstatuar se ajo ka vdekur, ka fshehur sopatën me të cilën e vrau tek një kazan me ujë, jashtë shtëpisë tek çezma.”

“Më tradhtoi me komshiun”, del dëshmia e të akuzuarit

Në këtë raport, zbulohet dëshmia e fqinjit që është akuzuar nga Skënder Hoxha se kishte lidhje jashtë martesore me Antoneta Hoxhën.

Dëshmia e fqinjit

S.H., është pyetur si person që tregon rrethanat e hetimit. S.H sqaroi se nuk ka patur asnjë lloj marrëdhënie intime me shtetasen Antoneta Hoxha. Me familjen e shtetasit Skënder Hoxha dhe me bashkëshorten e tij, Antonetën ka patur thjesht marrëdhënie familjare, hyrje dalje te njëri-tjetri për shkak se janë bashkëfshatar. Sot, më 30 prill, rreth orës 06:00, ka qenë në gjumë dhe në këtë kohë ka dëgjuar të bërtitura grash që vinin nga shtëpia e Skënder Hoxhës. Është ngritur dhe ka shkuar tek shtëpia e Skënderit, ku ka mësuar se Antoneta, bashkëshortja e Skënderit kishte vdekur. Më pas, aty ka mësuar se Skënderi e kishte vrarë me sopatë.