“Bastet tani luhen me telefon”, rrëfimi i të riut që vazhdon të luajë skedina

Nga 1 janari i vitit 2019, kompanitë e basteve sportive në vendin tonë pushuan së ushtruari aktivitetin e tyre me urdhër të qeverisë.

Të gjitha pikat e basteve u mbyllën, por ç'do njeri që dëshiron të vendosë skedinë, mund ta bëjë sërish, kësaj here jo me biletë të printuar, por nga telefoni ose tableta.

Andi, një i ri nga Elbasani, i intervistuar nga "Top Channel" tregon se ai vazhdon të luajë skedina pa problem, njësoj si më parë.

Ai ka qenë frekuentues i rregullt i lojërave të fatit dhe sot, pavarësisht se pikat e basteve ulën qepenët, kjo gjë nuk e ka ndaluar atë të luajë bixhoz.

Andi tregon:

U hoqën për dikë që e kishte me dy mendje të luante, sepse ai që ka për të luajtur do ta gjejë gjithnjë mundësinë. Por në realitet unë nuk besoj se ka ndryshuar gjë, sepse janë po të njëjtët njerëz, po të njëjtat pika bastesh. Besoj se tani e kanë më të lehtë, sepse nuk paguajnë taksa dhe as kanë licencë”.

Por si vendoset një loto sot? Mjafton të marrësh në telefon personin që është i regjistruar në një kompani të huaj bastesh dhe skedina vihet për pak sekonda.

Biseda e Andit me personin që vendos skedina:

Andi: Do më vesh një loto sepse nuk jam në Elbasan, jam në Tiranë dhe kur të vij t’i jap lekët? Personi: Në rregull. Andi: E kam fiksim që Manchester City do ta humbë kampionatin. Do t’i vesh 10 mijë lekë (1.000 lekë) 1-1 me pjesë? Ma dërgo pak biletën pastaj. Personi: Ta çoj unë me ‘screenshot’ në Whatsapp.

Duket se paratë qarkullojnë me mirëbesim dhe bileta e ndeshjes tashmë është një foto nga sistemi i kompanisë, e cila qarkullon në rrjetet sociale si dëshmi për lojtarin dhe bastvënësin.