Annegret Kramp-Karrenbauer është emri i gruas që mund të jetë kancelarja e ardhshme e Gjermanisë. Sipas skeptikëve kjo do të ndodh vetëm nëse Kramp-Karrenbauer arrin të dalë jashtë hijes që i krijon Merkel.
Nga ana tjetër Merkel do të mbetet kancerlarja e Gjermanisë deri në vitin 2021, por edhe më shpejt nëse ajo detyron të largohet.
Annegret Kramp-Karrenbauer është duke u përpjekur të bëjë çdo gjë që vërteton se ajo mund të jetë zëvendësuesja e Merkelit.
Por kush është Annegret Kramp-Karrenbauer?
Annegret Kramp-Karrenbauer e njohur ndryshe gjerësisht si AKK, për shkak të vështirësisë që hasin gjermanët në shqipërimin e emrit të saj. Tashmë ajo shihet si një kancelare e ardhshme potenciale nëse CDU fiton zgjedhjet e ardhshme në vitin 2021.
Ajo ka lindur në Saarland, një vend i vogël malor në kufi me territorin francez, AKK jetoi në një familje të madhe katolike në të cilën ajo u rrit me parimet e forta të një besimtareje katolike duke e vetëshpallur veten e saj si një katolike të rreptë.
Annegret e përshkruan veten e saj si një person të apasionuar mbas leximit dhe shprehet se gjatë viteve të saj të shkollimit nuk ka humbur asnjë orë mësimi.
Në vitin 1984, ajo u martua me Helmut Karrenbauer, inxhinier minierash me të cilin ka 3 fëmijë. Po në të njëjtin vit ajo filloi studimet e saj në Fakultetin e Drejtësisë dhe Shkencave Politike dhe pas përfundimit të studimeve bashkëshorti i saj vendosi të ishte një baba shtëpiak për 3 fëmijët e tyre në mënyrë që ajo të ngjiste shkallët e karrierës së saj.
Gjatë gjithë karrierës së saj profesionale, ajo ka punuar pa ndërprerje për të mbështetur të drejtat e grave. Çështjet e barazisë gjinore, dhe shfuqizimi i çdo forme diskriminimi janë fushat kyçe të punës së saj. Angazhimet e saj profesionale dhe vullnetare përqendrohen veçanërisht në fushat e tregut të punës, pjesëmarrjes politike dhe dhunës me bazë gjinore. Ajo ka qenë e angazhuar ndaj problematikave të tilla si dhuna seksuale ndaj grave. Po ashtu ka nisur edhe fushatën e ndërgjegjësimit "Thuaji jo – martesave të detyruara". Si një nga politikanet e para femra në Gjermani, ajo këmbënguli për një kuotë të detyrueshme për gratë në pozita drejtuese nëpër kompanitë publike dhe ato private.
