Rama dhe Veliaj si copy-paste, akuzojnë kundërshtarët politikë për t’iu shmangur përgjegjësive

Kryebashkiaku i Tiranës, Erion Veliaj në një intervistë të disa ditëve më parë, akuzoi paraardhësin e tij, Lulzim Bashën, se i ka dhënë leje vetes për punime shtesë në apartamentin e tij.

Ky ishte një nga justifikimet e shumta të përdorura nga Veliaj, për të justifikuar lejet e ndërtimit për kulla dhe inceneratorë.

Deklarata e Veliajt:

Kam çuar një pafundësi lejesh në prokurori. E di që disa kanë vajtur dhe në gjykatë. Kanë anuluar komplet projektin e vjetër të bulevardit të ri, pikërisht për ti prishur këto pazare dhe nëse do le të themi rezultatin më pikant të auditit shiko një vendim të Bashkisë së Tiranës, datë 1 gusht dhe thotë: Vendim për miratimin e lejes për zonjën Aurela Isufi dhe Lulzim Basha dhënë nga Lulzim Basha. Ka bërë 4 mbyllje dhe e para e punës ti flet për një. Ai ka marrë leje për një dhe ka bërë 5. Nuk ka bërë vetëm kat shtesë, ka bërë edhe 4 xhepat anash. Është puna tek parimi se duhet të jesh shumë i paaftë, i ulët, komplet pa nivel, fyes ndaj qytetarëve të tu që nuk shkon në Bashki. Nuk të punon sahati dhe i jep leje vetes tënde. E kam çuar në gjykatë dhe me të marrë vendimin e gjykatës patjetër do prishet. Ti pse nuk bën pa leje. Këta këtu, pse nuk bëjnë pa leje. Një që s’ka bërë këtu meriton të jetë kryetar opozite se është më e i ndershëm se një që në çdo mundësi e ka rrjepur këtë shtet.

Megjithatë kjo nuk justifikon veprimet e Veliajt, duke qenë së premtoi përpara se të merrte në dorë çelësat e Bashkisë së Tiranës, se do të kishte 0 ndërtime. Premtimi i Veliajt ishte thjesht një flluskë në ajër, pasi Tirana është kthyer në një kantier të madh ndërtimi.

Deklaratat e Veliajt nuk ndryshojnë shumë nga ato të shefit të tij të madh Edi Rama. Edhe ky i fundit, për tu ikur përgjegjësive hodhi akuza ndaj kundërshtarëve. Këtë e bëri gjatë një takimi ditën e djeshme në Durrës, ku u mundua të justifikonte blerjen e votave në zgjedhjet lokale, të cilat janë pjesë e dosjes 339, ku është i përfshirë drejtpërdrejtë, kreu i Bashkisë së Durrësit, Vangjush Dako.

Rama akuzoi demokratët se nxirrnin të burgosurit me leje dhe së bashku me deputetët terrorizonin qytetarët. Më tej ai u ndal edhe në Shijak, ku vepron grupi i strukturuar kriminal i Avdylajve, duke thënë se dikur nuk çonin dot komisionerë.

Deklarata e Ramës:

Këta të burgosurit i nxirrnin me leje, tani thonë foli Gjushi në telefon me Niçen. Na u bë Niçja si të ishte Aleksandër Moisiu, zëri i Niçes u bë si me qenë zëri i Luçiano Pavarorit. Këta i nxirrnin të burgosurit me leje dhe i merrte në krahë deputeti dhe vinte terrorizonte gjithë dynjanë. Flasin këta për krime, kriminelë? Ne nuk çonim dot komisionerë në Shijak, nuk shkonin dot njerëzit në komision, u detyrua partia ti conte pa njohur e mos ti shikonin nesër. I harruat zgjedhjet në Shijak që kërciti druri. Ata thonë jo se na vidhni votat.

Rama dhe Veliaj e kanë bërë rrugë tashmë, sa herë që iu ngec sharra në gozhdë, largojnë përgjegjësitë nga vetja dhe përpiqen të gjejnë fajtorin tek kundërshtarët. Kjo tregon se “shefi i vogël” ka kopjuar më së miri “shefin e madh”, duke i kopjuar jo vetëm metodën e justifikimit, por edhe atë të të bërit propagandë.

Kjo vërehet edhe në shprehjet e tyre të përbashkëta, ku njëri e thotë në kontekstin lokal, ndërsa të tjetri në rang kombëtar:

Kemi bërë shumë, por ka akoma ende punë për të bërë

Ky është marifeti më i bukur që përdorin, për të justifikuar premtimet e pambajtura./ G.Sh për JOQ Albania