Detaje të reja janë zbuluar ditën e sotme ënë lidhje me rolin e bashkëpunëtorëve në vrasjen e 26-vjeçarit Jurgen Kurti.
Për vrasjen e tij janë arrestuar tre persona dhe është shpallur në kërkim një i katërt. Të arrestuarit janë Elsi Levendi, 21 vjeç, lindur në Athinë/Greqi dhe banues në Tiranë; Alesio Berberi, 33 vjeç, lindur në Patos dhe banues në Patos, Fier dhe Olsi Qalliaj, 22 vjeç, lindur në Fier dhe banues në Patos.
Mësohet se të rinjtë janë me arsim 8-vjeçar dhe të papunë.
Bashkëpunëtorët dhe atentatori e kanë ruajtur “objektivin” prej dy javësh para se ta eliminonin.
Në momentin e atentatit, Levendi ka qenë në zonë dhe në këtë kohë ai ka njoftuar ekzekutorët për mbërritjen e 26-vjeçarit dhe e ka ndjekur në këmbë Kurtin deri sa ka mbërritur pranë banesës së tij.
Ai është takuar me atentatorët tek “Komuna e Parisit” pas vrasjes. Nga këqyrja e pamjeve të mbi 50 kamerave të sigurisë, është bërë i mundur identifikimi i lëvizjeve të 21-vjeçarit.
Pas vrasjes 4 atentatorët u takuan bashkë. Ata janë larguar me një automjet tip “Benz” ngjyrë gri, në pronësi të personit të shpallur në kërkim me inicialet K.B., i cili edhe drejtonte automjetin.
Automjeti rezulton i regjistruar në Fier me dokumente të rregullta.
3 të arrestuarit nuk kanë pranuar akuzat.
