Përdhunimi i 13-vjeçares në Kavajë, “Rilindja” dhe DAR nën hetim pasi fshehën skandalin prej ditësh

Prokuroria e Durrësit, ka nisur hetime për Drejtorinë Arsimore Rajonale Kavajë dhe për drejtuesit e Shkollës “Rilindja”, në të cilët ishte nxënëse e mitura që ra pre e përdhunimit.

Mësohet se hetimi i nisur nga organi i akuzës ka ardhur pas referimit të çështjes në Polici. Kjo për faktin se institucioni arsimor, u informua për skandalin dhe për pesë ditë me radhë heshti duke mos denoncuar krimin në polici.

Për skandalin e abuzimit të të miturës, janë në pranga 7 persona, ndërsa një tjetër është në kërkim. Në media është shprehur edhe babai i vajzës së përdhunuar nga tetë nxënësit e shkollës "Rilindja". Me dhimbjen e madhe për vajzën e tyre ai ka kërkuar që mediat ta mbyllin njëherë e pëtrgjithmonë këtë histori.

Ai shprehet:

Nëse më lejoni dua t’u bëj dhe një thirrje mediave, nëse jam plagosur një herë, ju lutem mos më plagosni sërish. Unë kam mbyllur çdo ekran televizori, çdo ekran Facebook-u, prandaj ju lutem me shpirt ju mediave, keni fëmijë vet mos ju raft ky rast asnjërit, por ju lutem mbylleni njëherë e përgjithmonë këtë problem. Me lejoni që ta përballoj me forcat e mia dhe me njerëzit e mi që më kanë mbështetur dhe do më mbështesin deri në fund. Ju falënderoj për mirëkuptimin, mos e paçi këtë rrisk, kjo që më ndodhi mua qoftë e para dhe e fundit."

Në vendimin e gjykatës së Durrësit thuhej se pasi u informua për ngjarjen, mësuesja e thirri nxënësen e mitur, duke i kërkuar t’i fliste për marrëdhënien me një nga djemtë e klasës. Në bisedë, vajza i ka rrëfyer asaj se ishte abuzuar seksualisht nga disa prej djemve të shkollës, të cilët e kërcënonin me publikimin e pamjeve filmike, në të cilat shfaqej duke kryer marrëdhënie me të dashurin e saj.

Në këto kushte, mësuesja thirri nënën e vajzës dhe në prani të drejtoreshës e psikologes së shkollës, i ka treguar gjithcka kishte ndodhur. Institucioni u mjaftua me kaq. Heshti për ngjarjen, pasi nuk e denoncoi krimin tronditës në polici.