Ministri i Brendshëm, Sandër Lleshaj në një komunikatë për mediat ka falenderuar policinë për punën e bërë me kapjen e Klement Balilit, në një kohë kur "Eskobari i Ballkanit" u vetëdorëzua.
Nga Ministria e Brendshme, Lleshaj e quajti këtë një operacion të sukseshëm të Policisë së Shtetit, kurse e vërteta në fakt është se Kelment Balili i vajti policisë në "derë".
Duhet të kujtojmë se Balili ishte "peshku i madh" që nuk u kap kurrë nga autoritetet shqiptare, deri në vetëdorëzimin e tij.
Vetëm në vitin 2018 ai ka mundur të nxjerrë duarbosh plot 15 herë Policinë e Shtetit, e cila ka organizuar një sërë operacionesh.
Klement Balili, emri më i kërkuar nga policia e shtetit që nga dhjetori 2016 është akuzuar për trafik ndërkombëtar lëndësh narkotike.
Në momentin që u shpall në kërkim, Balili, atë kohë 43-vjeçar (sot në moshën 46 vjeçare), ishte drejtor i transporteve në qytetin e Sarandës. Ai së bashku me familjarët e tij ka në pronësi disa biznese ndërkohë që prej më shumë se dy vitesh ai besohet se ishte fshehur në Shqipëri, dhe nuk ka dalë asnjëherë nga Shqipëria.
Balili aktualisht gjendet në ambientet e drejtorisë së Policisë i shoqëruar me avokatët e tij, Baftjar Rusi dhe Theodhori Sollaku.