62 ditë në protestë, banorët: Në burg duhet të jetë Afrim Qendro, jo Danieli

Banorët e Unazës së Re, janë në ditën e 62 të protestave. Madje edhe në natën e ndërrimit të viteve ata nuk e kanë ndërprerë protestën. Përveç dëmshpërblimit 100% të banesave apo bizneseve të tyre, ata kërkojnë edhe anulimin e plotë të projektit të Unazës së Madhe.

Banorët teksa brohorasin kundër qeverisë dhe projektit të “Unazës së Madhe”, që sipas tyre është një projekt korruptiv, i kanë kërkuar llogari prokurorisë se çfarë po bëhet me kallëzimin e tyre ndaj kreut të ARRSH-së Afrim Qendro.

Dorian Protoduari ka akuzuar autoritetet se kanë mashtruar lidhur me dëgjesat për projektin, ndërsa tha se Erion Veliaj dhe Afrim Qendro duhet të ishin në burg, e jo Danieli. Edhe një banor i cili ka folur edhe para mediave është shprehur njësoj si Produari.

Deklarata e banorit

Unaza e Re ka për tju çuar në burg. Atje ku është Danieli duhet të jetë Afrim Qendro. Ne nuk do largohemi nga protesta, ne nuk do të largohemi nga shtëpitë tona. Kërkojmë anulimin e plotë të projektit. Ne ende nuk kemi marrë një përgjigje nga Prokuroria, por ne nuk lëvizim nga pronat tona.”