Dimri ka qenë dhe vazhdon të jetë stina e problemeve më të shumta për shkak se kushtet atmosferike nxjerrin në pah mungesën e punimeve dhe ndërhyrjeve të nevojshme që parandalojnë rreziqet e përmbytjes, shembjes e me radhë.
Fshati Paleokastër në Njësinë Administrative të Cepos, 15 km larg Gjirokastrës, është më i rrezikuari këto ditë dhe në vijim të dimrit për shkak se rruga që lidh këtë zonë me aksin nacional mund të rrëmbehet nga lumi i Belicës.
Paleokastra ka qenë çdo vit në rrezik, por fatkësisht sivjet duket që ky fat është i pashmangshëm për shkak se situata është shumë kritike. Shtrati i mbetur i rrugës është tkurrur aq shumë sa edhe mjetet e vogla kalojnë me vështirësi.
Në këtë fshat kanë mbetur rreth 120 shtëpi, kryesisht me banorë të moshuar, të cilët shprehen se se situata e vështirë e kësaj rruge vetëm 3 kilometër të gjatë po ua bën të pamundur jetesën në Paleokastër.
Për TCH, të moshuarit thonë se dimri do të pengojë qarkullimin drejt spitalit dhe tregut.
Një pjesë e rrugës është shembur në një gjatësi prej 200 m, ndërsa edhe dy segmente të tjera rrezikojnë shembjen. Shpati që mban ende një copë të rrugës është dobësuar shumë, thonë drejtuesit e mjeteve, dhe është i rrezikshëm në çdo moment.
