Ditën e djeshme shkaktoi debat të madh publikimi i një ngjarje nga JOQ.al ku një person i identifikuar më pas si këngëtari Hajredin Gjeta, u filmua duke goditur me gur një qen rruge në Tiranë, në rrugën “Xhanfize Keko” rreth orës 05:20 të mëngjesit.
Pas publikimit të rastit këngëtari ka deklaruar në polici se ka qenë duke dalë për shëtitje së bashku me bashkëshorten e tij dhe qenin e tyre të vogël, ndërkohë që janë sulmuar nga disa qenë rrugësh, ku si pasojë e sulmit ka marrë plagë në trup bashkëshortja e tij, dhe qeni i tyre ka ngordhur nga kafshimet e marra.
Ekskluzivisht JOQ.al jus jell një tjetër video ku duket mjaft qartë se si tre qenë rruge masakrajonë qenushin e vogël të këngëtarit ndërsa në sfond dëgjohen ulërimat e bashkëshortes së tij e cila gjithashtu u kafshua nga këto kafshë duke pësuar dëmtime në pjesë të ndryshme të trupit.
Gjatë deklarimit në polici, këngëtari ka deklaruar se i ndodhur në kushte të tilla, për të mbrojtur bashkëshorten dhe qenin e tij nga sulmi i qenëve të rrugës, ai ka gjuajtur me lopatë dhe tullë një prej tyre.
Nga verifikimet e bëra nga Specialistët e Hetimit të Krimeve të Komisariatit Nr.4, rezulton se bashkëshortja e shtetasit H. Gj., si pasojë e kafshimeve të qenëve të rrugës ka pësuar dëmtime në pjesë të ndryshme të trupit.
Vetë këngëtari ka sqaruar ngjarjen edhe në profilin e tij në rrjetin social Instagram, ku bën apel për rrezikshmërinë e madhe të këtyre qenve që enden të lirë rrugëve të Tiranës dhe që nesër mund të vrasin edhe fëmijët tuaj.
